منتدى الفرح المسيحى - ليه الـ Unfriending و الـ block حركات غير ناضجة ؟!!

ليه الـ Unfriending و الـ block حركات غير ناضجة ؟!!
كتير اوي بنشوف الشخص اللي يكتب علي الاكونت بتاعه
" يا جماعة اللي مش معايا في الفكرة الفلانية يمسحني من عنده " أو
" أي حد مش مؤيد للموضوع المعين ده انا حعمله بلوك ! " ..
و يبقي اسهل حاجة للتعامل مع حد مقتنع بفكرة مختلفة عن فكرتك هو الانفصال و لو حتي الألكتروني عنه ..

في مقالة بعنوان Why Unfriending People on Facebook Is Immature
بيقول الكاتب DEREK BERES
إن الإنسان بطعبة كائن بيطور بالعلاقات و الأجتماعيات ,
لكن في خلال التطور ده ممكن يقابل افكار او قناعات مختلفة عنه ,
و اللي ممكن تكون سبب تهديد ليه و خلق صراعات جواه ..
لكن بدل ما يقرر يهرب منها او يختار انه يمنع الصوت اللي بتقولها , المفروض يتعامل معاها عادي خالص ,
فبغض النظر ان هو ده اللي بيطوره و يغيير من فكره الصباني , ده برضة رأي مختلف من حقه يكون موجود ! ..
فمن الضعف و التعصب ان الشخص يتعامل بس مع الاراء المشابة ليه و يمنع و يصد المختلف ..

نقطة مهمة برضة , ان قناعاتنا دايما في تطور مستمر ,
يعني انت انهاردة كنت رافض وجهة نظر معينه ممكن بكره تعتنق وجهة نظر ديه !

فمفيش تسليم مطلق للافكار , انما النقاش و التحليل بيوصل العقل لاختيار الأنسب و اعتناقه ..
فقمة عدم النضوج انك تخسر علاقتك بشخص لمجرد ان رأيه ده بيتعبك !

في النهاية انت من حقك تختار مين يبقي صديقك و مين لأ ,
بس مجرد حكمك علي اي شخص ميعجبكش رأيه انه لازم يبعد عنك او انه ميستحقش صداقتك ,
فده نوع مرضي من الغرور و هشاشة الشخصية ..
فالشجاعة مش انك تكون حاسس بامان وسط قطيعك اللي بيردد افكارك ,
انما الشجاعة انك تقدر تواجه القناعات المختلفة عنك و تفضل ثابت بمنطقك الحر !! ..
فمتزعلوش من اصحابكوا اللي بيمسحكوا او حتي بيخسروكوا لافكاركوا المختلفة عنهم ,
لكن ازعلوا علي جمودهم و سطحية افكارهم ..

كلمات كيرلس بهجت