منتدى الفرح المسيحى - ربنا يقول يمين نقوله شمال

https://upload.chjoy.com/uploads/146802532621.jpg

احيانا بنشوف الغلط ونعمله .. واحيانا بنشوف النافع لينا ونبعد عنه
واحيانا بنشوف كاس السم ونجري نشربه
واحيانا بنرمي مشورة الناس الصالحه علي الارض وندوس عليها
ربنا يقول يمين نقوله لا شمال
يقول علي طول نقوله لا ورا
بقينا زي الطفل اللي ساب ابوه في الزحمة علشان شاف بلونه بعيده
وصل للبلونه ومسكها وجاي يلف علشان يقوله " بابا شوف "
ميلاقيش بابا .. للأسف مبيشوفش غير ناس وشوشها غريبه وسط زحمة الحياة
هيرمي البلونه اللي كان هيموت عليها ويصرخ بعلو صوته ويقول " بابا بابا "

عموما متقلقش ,, بابا عينه عليك من اول ماسبت ايده لحد ماوصلت للبلونه بتاعتك
هو شايفك لأن عينه منزلتش من عليك .. لكن انت مش شايفه لأن عينك تاهت وسط وشوش كتيرة حواليك

ايه جميلة اوي بتقول
تأديبا أدبني الرب وإلى الموت لم يسلمني

فعلا من حنية ربنا علينا انه بيدي فرصة واتنين وعشرة
اختيارات غلط بنختارها بنحس بمرارها بعدين .. ويرجع يحليها لينا من جديد
نقول للناس .. انتوا معجبكمش اختياري من البدايه لكن انا كنت علي حق
لا ياحبيبي .. اختيارك كان غلط .. لكن ربنا مهنش عليه تعيش في الغلط ده كتير وتدوق مراره
فحاول يخلقلك طرق تانيه تحلي مرارة اختيارك .. كل الموضوع انك مهنتش عليه

بس متتعشمش ان كل مر هيحليه ,, لان اوقات لو حلالك المر .. ناس تانيه اللي هتدوقه
#وربنا_مش_ظالم