منتدى الفرح المسيحى - البنت الاجتماعيه ....!!!!

https://upload.chjoy.com/uploads/146757157771.jpg

البنت الاجتماعيه هى بنوته مميزه مرحه سريعة البديهه جريئه واثقه فى نفسها محبوبه نشيطه وغيرها من الصفات الجميله والمطلوبه فى البنت العصريه
بنقابلها كتير فى مجتمعات مختلفه فى الجامعه والكنيسه والنادى والشغل
وحتى هنا على النت بنشوفها كتير وبتلفت نظرنا
لكن المشكله بقى انها احياناً بتتفهم غلط .. اوقات بيفتكروا انه سهل خداعها وبتوصل انهم يشككوا فى اخلاقها وتصرفاتها
بيتمادوا فى تصرفاتهم معاها وبيتجاوزوا فى حدود كلامهم لحد المضايقه احيانا
بسرعه واول ما هيخطر فى بالك تقول رأيك هتلاقى نفسك بتعتب على البنت وتقول هى اللى مزوداها
لكن لو فكرت كويس فى صفاتها مش هتعرف تطلب منها تكون بنت منغلقه بتتكسف من خيالها بتتحرج تقول رأيها وتدافع عنه
صعب واحنا على ابواب سنة2017تطلب منها ترجع لقرن ورا
تقفل عليها بابها وتركز اوووى فى حاجه واحده بس
تستنى ابن الحلال ويبقى هو ده كل المطلوب منها
مستحيل ده يكون كل المطلوب من بنات النهارده
بعد ما اتعلموا واشتغلوا وانفتحوا على العالم
طيب لو العيب مش فى البنت هيكون فى مين
نظرة وقانون مجتمع بيحكم الكل لسه بيشوف انه فى فرق بين الولد والبنت
ولا نظرة الشاب لاى بنت اجتماعيه بيلاقيها فرصه سهله لصيدها
انا مش هوجه كلامى للولد ولا هنصحه يغير نفسه
لانى واثقه انه فاهم وعارف غلطه كويس
انا هقول للبنت حاجه واحده
اوعى تحاولى تكونى حد تانى غير نفسك علشان ترضى اى حد
طالما انتى صح ومبتغلطيش وعارفه واجباتك وقايمه بيها
وعارفه حقوقك وبتجرى وراها
يبقى مفيش حد ليه حاجه عندك
لكن خدى بالك
مش كل شخص يستحق ثقتك ومينفعش تعاملك يكون مع الكل باسلوب واحد
اوعى تنسى اختلاف البيئات والخلفيات والثقافات بيفرض عليكى
الحرص فى كلامك وفى تصرفاتك
الكلمه مهما كانت بريئه وغرضها المجامله ممكن توصل بمعانى مختلفه لشخصين
الفرق بينهم ان الاولانى بحكم تربيته وثقافته هيكون واعى لكلامك وفاهمك
اما التانى هتوصله بطريقه مختلفه ورد فعله هيكون مختلف بحسب تربيته وثقافته المحدوده
انتى زكيه كفايه وهتعرفى تحددى كويس بتقولى ايه امتى ولمين

اية رايكوا فى الكلام فى الكلام دة انا عاوزة اعرف راى كل وواحد وواحدة فيكوا