منتدى الفرح المسيحى - ازاي تنصحي بعلك ؟

ازاي تنصحي بعلك ؟
طبعا البعل بتاعك ( بدون نقطه علي العين ) زي كل البعال ،
كائن متمرد و مابيكرهش في حياته أد النصيحه والانتقاد ،
بس احيانا بيكون لازم تنصحيه او تلفتي نظره لغلطه في تصرفاته او مظهره ،، طب تعملي ايه ؟

عليكي بطريقه الساندوتش :
يعني تحطي النقد او النصيحه بين مدحين( انت رقيق اوي بس ساعات بتتعصب عليا مع انك صبور جدا ) .

وناخد مثال تاني في الهدوم :
يعني شوفتيه نزل كالعاده سوق الخميس اشتري احدث صيحه في البدله الكلاسيك ، كرافت فلوري علي جاكيت كاروه علي بنطلون مقلم بالطول ، ركزي علي اسوأ حاجه نفسك انه يغيرها وحطيها في النص ولتكن الكرافت .
ادخلي عليه مبتسمه :
- ياحبيبي ذوقك ف اللبس هاااايل ، يعني الچاكيت تحفه بس( الكرافت ) مش بنفس جماله مع ان البنطلون لايق جدا علي الچاكيت ( ساندوتش )،
وتاني يوم حطي البطلون في النص وهكذا لحد مايزهق وينزل الشارع ملط .

المشكله بقي ان حضرتك في موقف زي ده هاتصرخي في وشه وانتي بتقولي :
ايه يابني ادم الهبابه اللي انت لابسها دي !! شكلها زفت ومش لايقه خااالص علي باقي السلطه اللي تحتيها ،
( انتي صح لانه برضو هاينزل ملط مع اختلاف الطريقه )
بس النتيجه ٥٥٪ نسبه الطلاق في مصر !! ،
وكل ده علشان كرافت !!
طب م تتحرق الكرافت ، علي اللي اشتراها ، علي اللي لبسها ..وبعدين انتي مالك تتدخلي في لبسه ليه ؟

كلمات لأيهاب معوض