منتدى الفرح المسيحى - امتي تتجوزي خطيبك ؟

امتي تتجوزي خطيبك ؟
اولا مش لازم تتجوزيه ، يعني وارد تكونوا اكتشفتوا في فتره الخطوبه انكم مش مناسبين لبعض، يبقي يغور في داهيه وتتجوزي غيره ، متلقحين ع القهاوي (باصبرك طبعا)!!

- طب امتي نتأكد اننا مناسبين لبعض فنتجوز ؟
لما تتخطبو لمده ماتقلش عن 6 شهور و يحصل بينكم فيها تناغم خماسي الابعاد ،،
جسدي روحي عقلي عاطفي اجتماعي :

1 - جسدي .. يعني حصل بينكم قبول شكلي ، مش شرط يكون وسيم ولا امور ، بس يكون شكله مناسب ، مظهره لطيف ، تمشي معاه وانتي فخوره مش مكسوفه حد يشوفك ، وارد يكون عنده قميص واحد بس نضيف علطول ، وارد يكون اوزعه بس متناسق ، وارد يكون طويل بس اهبل .
وعلي فكره الجسد والشكل عموما اهم في الاختيار عند الراجل لأنه بصري ،لكن انتي يهمك اكتر الحاجات اللي جايه .

2- روحي .... يعني يطلع روحك ،،، مريح كده وينفع تحكيلو ويسمعك ، تبقي متطمنه وانتي قاعده معاه ، يعني بتحسي معاه زي ما بتحسي مع صاحبتك الانتيخ ( لتات ) ، تقدرو ترغوا في اي حاجه تافهه ، تشتغلوا نميمه وتقطيع في فروه صحباتك عادي جدا . وده يبقي الزوج الصديق وانجح الانواع .

3- عقلي ،،، يعني بيملا دماغك ، او بمعني اصح بيعرف يشتغلك ، بينكم تناغم فكري نظمي فهمي ثقافي ، مايكونش تافه ولا فاضي ، يعرف يخطط لاحلامكم (يقدر يسرق بنك مثلا ) .

4- عاطفي ،،،،، مش شرط يكون مسهوك وبيعرف يقول كلام عاطفي ، ولا شرط يكون بينكم قصه حب ، بس المهم تكون موجوده بذره المشاعر اللي تصنع الحب ، يعني مافيش نفور ، مافيش كراهيه وجواز اضطراري ، يعني مبسوطه انه جاي يزوركم ( علشان بيجيب فاكهه ياواطيه )،

5- اجتماعي ،،،، ودي حاجه مش بأيدك ولا بأيده بس ممكن تخلي الجوازه تفشل ونقول مافيش نصيب ، وهي التفاهم والانسجام الاسري ، العيلتين انسجمو وتوافقو ، امه بقت تحبك ( وده مستحيل ) ، امك بقت تحبه ( علشان جاب ياميش رمضان ) ، متكافئين اجتماعيا، يعني بتصيفو في نفس المكان ( بلطيم - راس البر - جمصي ) ،

لو حصل التوافق الخماسي ده بنسبه معقوله وماتقلش عن 60 % يبقي توكلي علي الله واخلعي منه ، بلا جواز بلا وجع دماغ ، صدقينى حضن امك بالدنيا

موضوع لأيهاب معوض