منتدى الفرح المسيحى - منتظرينك حسب وعودك (الصعود)

https://upload.chjoy.com/uploads/1465513555921.jpg

انهارده هايصعد الحبيب . رغم انه منظر مهيب جدا. لكن كمان منظر محزن. لسان حال التلاميذ. ياه يا يسوع 3 سنين ونص واحنا معاك ، أكلنا وشربنا وضحكنا واتعودنا على وجودك
يوحنا: حضنك هايوحشنى
يسوع: هانا معكم كل الايام
بطرس: مين يستحملنى فى غلطى وغباوتى وتصرفاتى الغلط
يسوع: هانا معكم كل الايام
التلاميذ: احنا مصدقنا شوفناك بعد ماشوفناك ميت . هانعيش اذاى من غيرك
يسوع: خليكوا هنا ماتتحركوش هابعتلكوا المعزى هايفكركوا بيا ويعلمكم
وفضل يصعد . يصعد .. يصعد وهما عيونهم اكنها بتقوله(ماتسبناش. ماتسبناش . ماتسبناش)
لحد ماجت سحابه وخدته من عيونهم
لكن هما فضلوا باصين للسما وجه ملاك وقالهم( قالهم اللى شوفوتوا صاعد هايجى تانى )
ومشيوا ودخلوا العليه. وقعدوا يصلوا
تخيلوا الاجساس كل الايام دى بيصلوا من غير مايشوفوا يسوع زى مامتعودين. ومافيش معزى لان المعزى لسه مجاش) لا قادرين يتحركوا ولا قادرين يفرحوا. بس بيصلوا مع بعض وكل واحد متألم بيسند التانى . حد يفتح الشباك بتاع العليه ويرفع عينه للسما اهو يمكن يشوفوه
ربنا كان حابب ينقل الكنيسه من الايمان المنظور الى الايمان الغير منظور
اوقات كتير بنبقى فى نفس وضعهم . بتصلى ومش متعزى. بتصلى ومستنى . بتصلى ومش عارف امتى هاتتعزى وتفرح
لكن فجاءه قوه الروح القدس يحل ويملى المكان والكل يخدم ويفرح
ربنا بيقولنا فى العيد ده(خليكوا مكانكوا ارفعوا بس قلبكوا ليا وانا هافرحكوا)
واحنا بنصرخ وبنقولك(منتظرينك حسب وعودك)