منتدى الفرح المسيحى - روح لربنا باللي عندك

روح لربنا باللي عندك

● داود كانت النقطة المميزة فيه مشاعره .. فكان كل اللي بيقدر يعمله انه يروح لربنا بمشاعره وينقلهاله وأحيانا كان يكتبها في ورق ويغنيها أو يصرخها أو يعاتبه بيها.
(وصل لربنا بمشاعره)
● أرميا كانت العلامة المميزة هي (الدموع) كل اللي بيقدر يعمله إنه يبكي ويعيط ويشكي لربنا اللي بيحصل وسط شعبه .. كتير من سفره دموع وألم ومراثي .. كل اللي بيملكه شوية دموع وصراخ.
(راح لربنا بدموعه)
● يعقوب كان عنيد وعصبي .. آخر مازهق ماتكسفش إنه يروح لربنا بعنده وعصبيته وراح بيتخانق معاه ومتبت وماسك فيه ويقول له
"لن أطلقك إن لم تباركني" وفعلاً نال ما طلبه.
(راح لربنا بعنده وعصبيته وصراعه)
● العشار راح يصلي ماكانش عنده حاجة يقولها غير أربع كلمات
"اللهم إرحمني أنا الخاطي" والله برره رغم صغر صلاته وإمتدحه لأنه كان صادق وراح باللي في قلبه.
(وصل لقلب ربنا بأربع كلمات)
●● في صلاتك وخلوتك وعلاقتك مع ربنا ماتحطش طريقة أو فرض تفرضه تحاول توصل بيه لربنا ..
شوف إيه الحاجة اللي جواك اللي تقدر توصل بيها لربنا (مشاعرك - آية - كلمة صغيرة من قلبك - دموع - عتاب - ترنيمة - لحن - كلمات كاتبها لربنا في ورقة ونفسك تقولهاله)
ماتتكسفش روح لربنا باللي في قلبك وباللي قادر تتواصل معاه بيه ..
إوعي تقطع الإتصال معاه وتقول مش عارف أصلي ..
روح له باللي عندك هايبقى عنده بالدنيا كلها