منتدى الفرح المسيحى

مش رجولة إنك تمد إيديك عليها
مش رجولة إن انت تشخط حتي فيها
او عشان تضحك سيادتك ،
تبقي سايب دمعة الضعف ف عنيها
الرجولة إنك مجرد .. تحتويها
تبقي بيتها
لحظة الصمت انت صوتها
تحترمها لإنها إنسانة زيك
إيه غاصبها تعيش معاك ف البهدلة ؟
إنها كائن رقيق ،
ما تعاملها بجنتلة !
خدها بين إيدك ، كطفلة
فرح "البيبي" اللي فيها بكلمة حلوة
هاتلها إن شالله وردة
واوعي يوم تجرحها بالماضي اللي قبلك ،
وانت مالك باللي عدا ؟!
واللي فات هيفيدكوا ايه
مش رجولة إنك تدوس علي إيد بتوجع
الرجولة إن تكون الأحلي ليها ... واللي جاي طمنها بيه
مش رجولة إنها منك تخاف ،
الرجولة ف إن قلبك .. هي بس تخاف عليه
أقصي أفراح البنات ،
لما تحكي لأنتيمتها ع اللي بتموت هي فيه
عندي حق انا ،
وللا إيه ؟!
"مينا مجدي"