منتدى الفرح المسيحى - فى عيد الحب الهديه او النكد

حاجة بتحصلنا ، إننا يا جماعه بنستثمر اﻷعياد مش في الفرحة ، ﻷ في النكد
أقولكم إزاي ، كلنا عارفين إن عيد اﻷم وعيد الحب وعيد الميلاد كلها أعياد كده وكده ، يعني مجرد مناسبات الناس إقترحوا إنها تبقي يوم للإحتفال باﻷم ، أو الحبيبة أو أو .....;)
كتير مننا بقي تقعد في عيد الحب تستني هيجيب لها إيه جوزها أو خطيبها في عيد الحب وتستغلي هدية وتقدمها له وطبعا برضه كتير بتتفاجئ إن شريك حياتها إما جاب هدية مش غالية زي بتاعتها ، أو مجابش خالص:o
، ناسي ، مشغول ،مفلس ، او مش معترف باﻷعياد دي والنتيجة النهائية مشاكل وخصام وخناقات والست تعقد نفسها وتقول مبيحبنيش ، مش غالية عنده والراجل يقعد يدعي علي إلي عمل العيد ده والست تقعد تشكي للناس ، حسرة عليا إلا ما إفتكرني بوردة ولا ممكن يبقي الراجل عنده ظرف منيل وهي مش مقدرة ظروفه وعنيها طالعة علي الورد إلي في الشارع عايزاه يجيب منه بصرف النظر عن الظروف ، مامته مثلا عيانة ، أخوه عامل حادثة ولا متخانق مع رئيسه في الشغل ومغموم ودي في دنيا تانية ، عايشة مع الورد والدباديب ولو برق لها لما تطلب تستغرب إيه الراجل العجيب ده ، دا أنا طلبت ببوقي بدل ما يعملها من نفسه؟!!!!:o

أو مثلا في عيد الميلاد الست تقعد تحنتف لجوزها وتعمله عيد ميلاد محصلش وتيجي بقي علي عيد ميلادها وسانة سنانها وتلاقيه ناسي أساسا وبرضه المسلسل بتاع إتصدمت وذهلت وبدل ما يبقي عيد ميلاد وفرحة يبقي عيد النكد والغم والست تتغم وتغم جوزها وتسود عيشته، طب ما حلها بسيط ، يا ستي متحنفيش له في عيد ميلاده ومشيه يوم عادي لو إنتي عاملاها واحدة بواحدة لكن هتفرضي عليه إسلوب حياة معين وإما تحتفلوا بأعياد الميلاد بهيصة وإما النكد يبقي بلاش منه أحسن:confused:

للتذكرة ياجماعه عيد الحب معمول علشان الناس تفرح مش علشان تنكدوا علي بعض بمعني لو إفتكر وجاب هدية بسيطة يبقي نفرح ولو ما إفتكرش يبقي منزعلش و ننكد علي نفسنا ﻷن ببساطة النكد بيجيب الضغط والسكر وحاجات تانيه طيب وليه صحتك بالدنيا والبيت اللى يسكنه ربنا أهم بكتير من حد نسي عيد ميلاد اوعيد حب او حتى عيد جوازكم خلى ربنا هو:)
قائد البيت وهو الاول فى حياتكم
ساعتها مش محتاجين او مش هتفرق مين افتكر الاول او مين جاب هديه ومين مجبش