منتدى الفرح المسيحى - الماده دي بتاعتك !!!؟

الماده دي بتاعتك !!!؟

الاستاذ / ك . ح . ع

على فكرة انا البابا كيرلس عمل معايا معجزة
فى سنه ثالثه فالكليه
في مادة كانت صعبه اوى
وكان بيدهالنا دكتور متعنت جدا جدا جدا
ومشهور بكدة
لدرجه انه اتفصل بسبب الموضوع دة بس للاسف رجعوة تانى

كان يقول انا المادة بتاعتى لو انا نفسى روحت امتحنت
مش ممكن ابدا اخد فيها جيد .
يعنى بيقول انه مش هينجح اى حد

ولكن اللى يحصل انه انا خليت شفيع المادة البابا كيرلس
وانا وطالع على الامتحان كنت ببكى
لانى بصراحه بنعمه ربنا عمرى في حياتى
ما شلت اى مادة من سعت ما عرفت المدارس
لغايه ما وصلت الكليه
وبصيت لصورة البابا كيرلس
وقلتله المادة دى بتاعتك انت اتصرف فيها

و روحت الامتحان
وحليت فيه يمكن على تقديرى انا اللى يدينى المقبول
فالمادة يعنى على تقدير الدكتور سقطت فالمادة
اللى قدر نفسه شخصيا بلسانه انه هو نفسه لو امتحن مش هينجح نفسه
افاجئ بالنتيجه بتاعتى فالمادة دى جيد
على الرغم انه معايا زمايلى الاوائل
فدفعتى فيهم اللى شال المادة
وفيهم اللى جاب فيها مقبول
وانا بنعمه ربنا وشفاعه البابا كيرلس
جبت فالمادة جيد
عظيمه هى أعمالك يارب فى قديسيك