منتدى الفرح المسيحى - معا كل يوم قصة قصيرة 9\9

مره شاب راح لأب أعترافه وسأله وقاله " ليه ربنا بيسمحلى أنى أختار حد واحبه وأتعلق بيه وفى الأخر ميكونش فيه نصيب وأتعب أنا و هى !!؟ "

فأبونا قاله حاضر هقولك بس فى الأول هاتلى ورقة وقلم من جوا ع المكتب وتعالى أقعد جنبى ,., راح الشاب دخل بسرعه وجاب قلم و ورقة لأبونا وقعد جنبه . . .

راح أبونا مسك الورقة والقلم وجه يكتب راح لقى سن القلم مكسور , فقاله سن القلم مكسور ومش هعرف أكتب بيه أنت مأخدتش بالك ليه ! ادخل يلا هاتلى قلم تانى .

دخل وجابله قلم تانى وجه , وأبونا مسك القلم ولسه هيكتب فى الورقة لقى أن القلم طافح , فقاله القلم بايظ خالص أنت ازاى ماختش بالك منه ! أدخل يلا هاتلى قلم تانى .

دخل وجابله قلم تانى و جه لأبونا ، أبونا مسك القلم وبيبص ع القلم لقى القلم فاضى , فقاله القلم فاضى أنت ليه ماختش بالك كويس , أدخل هاتلى قلم تانى .

راح دخل الشاب وقعد يدور كويس ع أحسن وأحلى قلم , وجابه لأبونا وقعد جنبه . . .

أبونا قاله بص يا حبيبى أنت صحيح تعبت لما كنت كل شويه بتدخل تجيب قلم وتيجى بس فى الأخر عرفت تختار أحسن وأجمل قلم نكتب بيه ,., وربنا كمان بيسمحلك أنك تتعب وتختار غلط فى البدايه وتكسب خبرة علشان فى الأخر تقدر تختار أحسن قلم تكتب و ترسم بيه حياتك