منتدى الفرح المسيحى

يارب انا كتير سيبتك
ودايما بخيب ظنك فيا
صدقني انا ابنك وبحبك
بس الخطيه بتستقوي عليا
قويني يارب دايما بحبك
وامسك علي طول في ايديا
انا مستهلش يارب طيبتك
علمتني معني التضحيه
بجرحك وبزعلك مني
ولما احتاجلك وقت الشده
اقولك يارب ساعدني
الاقيك بتمد ايديك بفرحه
وبتقولي ارجعلي يا ابني
مكثوف يارب منك
مش قادر اوريلك وشي
انا ياما بعدت عنك
وانت عمرك ما اتخليت عني
كل الناس انساها ولا عمري يوم انساك
خليك دايما جنبي وهاعيش العمر معاك
علمني يارب ازاي احبك
علشان احبك مهما يطول الزمان
خبيني يا يسوع في حضنك
علشان مبقاش في الدموع غرقان
يارب من ايديك متسبنيش
دا انا لما ببعد عنك بكون تعبان
خلي عينك عليا عشان اعرف اعيش
ومبقاش تايه في الدنيا دي او غرقان
انا بعمل المشكله واتسخبي جنبك
ما انت ابويا معاك بحس بالامان
انا بطلب حاجات كتير منك
وساعات بنساك ومش بفتكرك
الا في وقت الضيقه احتاجلك
يارب انا اسف سامحني
ارحمني يا ارب ارحمني
قويني يارب واسندني
والهموم شلها مني
والذنوب ابعدها عني
انا تعبان مليان ذنوب
وكل مره اقول انا هتوب
اسيبك وابعد عنك
شلت عني صليبي
والاقيك بتجيلي تحميني
ومن امراضي تشفيني
فديتني بروحك علشاني
وانا مستاهلش يارب
قويلي من تاني ايماني
علمني معني الحب
انا هسيبلك حياتي يا رب
ومعاك مش هشيل هم
انت تتصرف فيها
وتمشيها زي ما تحب
اتكلت عليك يا ربي
وماليش غيرك انت
ومهما بعدت عنك
هفضل برضو احبك
بحبك يـــــــا ربي

بقلمي