منتدى الفرح المسيحى - زوادة اليوم: الأخد والعطاء : 4 / 2 / 2026 /

زوادة اليوم:
الأخد والعطاء

قال كان فيه مرَّة عجوز عاقلِة إلها حفيد بتحِبّو كتير... ولا مرَّة رَفَضِتلو طَلَب... طَلَب مِنها مرَّة قطعة فضَّة لأنّو الإيّام ضيّقَة مَعو، قالِتلو :

- بخزانتي في قطعة واحدة، خِدها، اشتِغِل ، وارتاح ورِدّها.
أخدها الشاب وردّها.

وتكَرَّرِت الحادثِة أكتَر مِن مرَّة، لحين ما مرَّة أخَدها وما ردّها.

ولمّا بعد مدِّة رِجِع يُطلُب، قالِتلو سِتّو :

- روح ع الخزانة وخود المال، مع إنها عارفِة إنّو ما في شي.
مدّ إيدو وطُلعِت سَلّتو فاضية.

قَلّها :

- ما فيه فضَّة يا سِتّي بالخزانة.

قالُت :
- مطرَح اللي ما بتحُطّ شي ما بتلاقي شي، الخزانة فاضية لأنَّك ما ردَّيت القطعة.

الزوّادة بتقلّي وبتقلَّك :

إخوتي، نحنا شو عَم نوضَع حتَّى نلاقي؟ شو عَم نِزرَع حتَّى نُحصُد ؟

مِنقول جيلنا ضايع، علاقاتنا غير صادقة، ما فيها شفافيِّة.
بَلَدنا مليان فوضى : شو عم نعمُل تَ يكون غير هَيك؟

شو رأيَك اليوم، تقَرِّر شو بدَّك تُحصُد، وتبَلِّش تِزرَع عَ هالأساس ؟ والله معك.