منتدى الفرح المسيحى

النهاردة هنتكلم عن: "ذبيحة الإثم"
يلا بينا نفتح قلبنا ونشوف ربنا رتب لنا إيه لما نغلط في حق غيرنا
يعني إيه ذبيحة إثم؟👇🏻

دي الذبيحة اللي بنقدمها لما "نتعدى" على حقوق غيرنا، أو نخون أمانة
، أو ناخد حاجة مش من حقنا أو بناخد حاجة بالظلم.

عارف لما تاخد حاجة مش بتاعتك وتكتشف إنك وجعت صاحبها وخسّرته؟
هنا ربنا بيقلك:
"التوبة مش بس كلام، لازم ترجع اللي أخدته وتصلح اللي انكسر عشان قلبك يطمن"
طيب إيه الفرق بينها وبين ذبيحة الخطية؟
ببساطة كدة:

ذبيحة الخطية: غلطة بينك وبين ربنا
(كسرت وصية)

ذبيحة الإثم: غلطة سببت "خسارة مادية"
لحد تاني (أخدت حق حد)

يعني ذبيحة الإثم هي ذبيحة "رد الحقوق"
طيب الحكاية بتبدأ إزاي؟
قبل المذبح وقبل كل حاجة، فيه خطوة "جبر خاطر" لازم تحصل: 👇🏻
"وَيَرُدُّ مَا أَخْطَأَ بِهِ.. وَيَزِيدُ عَلَيْهِ خُمْسَهُ، وَيَدْفَعُهُ إِلَى الْكَاهِنِ"
(لاويين 5: 16)

والحركة دي معناها:
"يا رب، أنا رجعت الحق لصاحبه،
وزودت عليه 20% تعويض عن الضرر، ودلوقتي جاي أطلب غفرانك".
وهنا ييجي دور الكاهن مع "الدم"
الكاهن بياخد الدم ويرشه على المذبح من كل ناحية 👇🏻
"فِي الْمَوْضِعِ الَّذِي يَذْبَحُونَ فِيهِ الْمُحْرَقَةَ، يَذْبَحُونَ ذَبِيحَةَ الإِثْمِ،
وَيَرُشُّ دَمَهَا عَلَى الْمَذْبَحِ مُسْتَدِيراً"
(لاويين 7: 2)

ومعنى الرش "المستدير" ده إن دم الفداء بيحوط كل جوانب غلطتك ويغطيها تماماً،
كأن ربنا بيقولك: "خلاص، الحق رجع والذنب اتمسح".

وبعد كدة ييجي دور "الشحم"
زي ما اتعودنا، أغلى حاجة في الذبيحة بتروح لربنا 👇🏻
"وَجَمِيعُ شَحْمِهَا يُقَرِّبُهُ مِنْهَا.. وَيُوقِدُهُنَّ الْكَاهِنُ عَلَى الْمَذْبَحِ وَقُوداً لِلرَّبِّ. إِنَّهَا ذَبِيحَةُ إِثْمٍ"
(لاويين 7: 3-5)

وده معناه إننا بنعترف إن ربنا هو صاحب الفضل،
وهو اللي بيقبل ذبيحتنا ويرضى عننا بعد ما صلحنا غلطنا مع الناس.

بس فيه حتة مهمة في ذبيحة الإثم:
إنها بتعلمنا إن "الأمانة" غالية قوي عند ربنا، وسماها "قدس أقداس"
يعني ربنا مبيتهاونش في حقوق الناس الغلابة.

تعالى بقى "نفصص" اللي بيعمله الكاهن في ذبيحة الإثم،
عشان تعرف هي ليه كانت دقيقة ومختلفة:
أولاً: مكان الذبح (نفس مكان المحرقة)
الذبيحة دي لازم تتذبح في نفس المكان اللي بتتذبح فيه "المحرقة"
وده ليه معنى كبير أوي..
إن ربنا بيقلك: "زي ما أنا بقبل حبك الكامل في المحرقة،
أنا كمان مهتم بصلحك وتوبتك في ذبيحة الإثم"

ثانياً: رش الدم الرش المستدير زي ما قلنا
الكاهن هنا مش بيحط الدم على "قرون المذبح" بس زي ذبيحة الخطية " لا."
ده بيمسك وعاء الدم ويرشه
"عَلَى الْمَذْبَحِ مُسْتَدِيراً"
(لاويين 7: 2)

يعني بيلف حوالين المذبح ويرش الدم على الزوايا بتاعته
بحيث الدم يغطي المذبح من كل اتجاه.

طيب إيه اللي نتعلمه من ذبيحة الإثم؟
التوبة الفعلية: إنك لو أكلت حق حد،
صلاتك مش هتتقبل إلا لما ترجع الحق ده وتراضيه.

جبر الخواطر: ربنا رحيم قوي، وعامل حساب "الخسارة"
اللي وقعت على المظلوم وعوضه عنها بالزيادة.

المسيح هو الفادي: هو اللي سدد عنا كل ديوننا
اللي مكناش هنقدر ندفعها، وبدمه رجع لنا كرامتنا