منتدى الفرح المسيحى - الحجاب والستر

الحجاب والستر
البوابات اللي بتداري وبتحمي وبتفتح لنا طريق للنعمة
بعد ما حكينا امبارح عن الأعمدة اللي شايلة الخيمة،
كان لازم نسأل:
طيب إيه اللي مستخبي جوه؟
وإزاي ربنا عمل "فواصل" وستائر تحمي قدسية المكان؟
يا جماعة الستائر دي مش مجرد قماش مرسوم، دي هي "الستر" اللي ربنا عاملهولنا.

وعلشان كدة ربنا قال لموسى يعمل أهم ستارة في الخيمة كلها،
الستارة اللي بتفصل بين "القدس" و"قدس الأقداس"
ووصفها بدقة وقال:👇🏻
«وَتَصْنَعُ حِجَابًا مِنْ أَسْمَانْجُونِيٍّ وَأُرْجُوانٍ وَقِرْمِزٍ وَبُوصٍ مَبْرُومٍ. صَنْعَةَ مُخْتَرِعٍ يَصْنَعُهُ بِكَرُوبِيمَ»
(خروج 26: 31)

الستارة دي كانت غالية أوي، قماشها كتان أبيض نقي ومطرزة
بخيوط من ألوان السما والملوك، وكان مرسوم عليها ملائكة (كروبيم)،
كأن ربنا بيقولنا إن المكان ده سماوي ومقدس جداً.

والستارة دي بالذات كان ليها مكان محدد
عشان تفصل بين العبادة اليومية وبين حضور ربنا نفسه، وقال عنها:👇🏻
«فَيَفْصِلُ لَكُمُ الْحِجَابُ بَيْنَ الْقُدْسِ وَقُدْسِ الأَقْدَاسِ»
(خروج 26: 33)

ومش بس كدة، ده كمان عمل "ستر" تاني (سجف)
على مدخل الخيمة من بره، عشان الكاهن
وهو داخل يسيب وراه تراب البرية وعواصفها ويستخبي في حضن النعمة.
وقال لموسى:👇🏻
«وَتَصْنَعُ سِجْفًا لِمَدْخَلِ الْخَيْمَةِ مِنْ أَسْمَانْجُونِيٍّ وَأُرْجُوانٍ وَقِرْمِزٍ وَبُوصٍ مَبْرُومٍ صَنْعَةَ الطَّرَّازِ»
(خروج 26: 36)

والستارة دي كانت متشالة على خمس أعمدة
زي ما شرحنا امبارح
متشاله من خشب السنط متغطية بذهب،
وقواعدها من نحاس عشان تستحمل الهوا والشمس،
كأن ربنا بيقولنا إن النعمة محتاجة أساس قوي ومثبت.

طيب الحكاية دي بتقولنا إيه النهاردة في العهد الجديد؟
الستائر دي يا جماعة هي "صورة" للمسيح اللي جه وسترنا بنعمته
(البوص) يعني طهارته،
والأرجوان يعني ملكنا العظيم،
والقرمز يعني دمه اللي فدانا،
والأسمانجوني يعني لونه السماوي.

ربنا مش بس عاوز يسترنا، ده بيسترنا بصفاته هو عشان ننسى مرار العالم.

والجميل بقى إن الستارة (الحجاب)
اللي كانت مرسوم عليها ملائكة بتقول "ممنوع الدخول"
دي انشقت بموت المسيح له المجد
الحيطة السد اللي كانت بينا وبين ربنا وقعت،
وبقت النعمة فاتحة حضنها لكل واحد فينا يدخل لحد "قدس الأقداس"
وهو مطمن ومسنود على فداء المسيح.

ربنا عاوز يقولك إن "الستر" مش بس عشان يداري،
ده عشان يفتحلك طريق جديد للحياة معاه.

اطمن.. إنت النهاردة مش لوحدك في العواصف، إنت مستور في المسيح.
ربنا عملك "ستر" بدمه، وفتحلك الطريق لحد عنده عشان تشبع بنعمته وتنسى كل تعب الدنيا.