منتدى الفرح المسيحى - المرحضة النحاسية

المرحضة_النحاسية
المحطة اللي بنغسل فيها تعب الطريق ونستعد لمقابلة ربنا بقلب نقي.
بعد ما دخلنا من الباب وعدينا السور اللي حكينا عنه الحلقة اللي فاتت،
لقينا قدامنا "المرحضة النحاسية" واقفة بين المذبح والقدس،
كأن ربنا بيقولنا: "بعد ما قدمتوا ذبيحة (فداء)، لازم تغسلوا إيديكم (توبة)
قبل ما تدخلوا عندي"

يا جماعة، المرحضة دي مش مجرد حوض مية،
دي هي "المرآة" اللي بتكشف لنا حقيقتنا من جوه..
وعشان كدة ربنا وصف لموسى تصميمها بدقة وقال: 👇🏻
«وَتَصْنَعُ مِرْحَضَةً مِنْ نُحَاسٍ، وَقَاعِدَتَهَا مِنْ نُحَاسٍ، لِلاغْتِسَالِ
. وَتَجْعَلُهَا بَيْنَ خَيْمَةِ الاجْتِمَاعِ وَالْمَذْبَحِ، وَتَجْعَلُ فِيهَا مَاءً»
(خروج 30: 18)

وعارفين إيه أعجب حاجة في المرحضة دي؟
إنها القطعة الوحيدة في الخيمة اللي ربنا محددش ليها مقاسات!
كل حاجة كان ليها طول وعرض بالذراع، إلا المرحضة..
كأن ربنا عاوز يقولنا إن "غفرانه" و"مية التوبة" ملهاش حدود ولا مقاييس،
رحمته واسعة جداً وبتكفي أي حد ومهما كانت خطيته.

المرحضة دي كمان كان ليها قصة عجيبة في صنعها،
لأنها اتعملت من "مرايات" الستات اللي كانوا بيخدموا عند باب الخيمة،
والكتاب سجل لينا التفصيلة دي وقال: 👇🏻
«وَصَنَعَ الْمِرْحَضَةَ مِنْ نُحَاسٍ وَقَاعِدَتَهَا مِنْ نُحَاسٍ.
مِنْ مَرَائِي الْمُتَجَنِّدَاتِ اللَّوَاتِي تَجَنَّدْنَ عِنْدَ بَابِ خَيْمَةِ الاجْتِمَاعِ»
(خروج 38: 😎

زمان المرايا مكنتش إزاز،
كانت نحاس بيلمع جداً،
فكان الكاهن وهو بيغسل إيده ورجله، بيشوف صورته بوضوح في النحاس والمية،
كأن ربنا بيقول إن كلمته هي "المراية" اللي بتعرفنا عيوبنا عشان نصلحها.
وكانت المية دي شرط أساسي للخدمة، وربنا حذر هارون وبنيه وقال: 👇🏻
«فَيَغْسِلُونَ أَيْدِيَهُمْ وَأَرْجُلَهُمْ لِئَلاَّ يَمُوتُوا. وَيَكُونُ لَهُمْ فَرِيضَةً أَبَدِيَّةً»
(خروج 30: 21)

طيب الحكاية دي بتقولنا إيه النهاردة في حياتنا؟
المرحضة النحاسية دي هي "سر التوبة" و"قوة كلمة ربنا".
النحاس (المراية) بيكشف الخطية اللي في حياتنا، والمية بتغسل وتنقي القلب.
زي ما الكاهن كان بيغسل إيده (أعماله) ورجله (سلوكه ومشيه)

إحنا كمان محتاجين نراجع تصرفاتنا كل يوم قدام كلمة ربنا قبل ما نقف نصلي.

الجميل بقى إن المية دي دايماً موجودة،
ومكانها "ثابت" مش بتتشال بعصي زي باقي القطع،
بتقول لكل واحد فينا: "مهما كانت إيدك اتبهدلت من تراب العالم، التوبة متاحة ليك في كل وقت"
أول ما تقف قدام ربنا بالتوبة والاعتراف وتغسل قلبك بدموع التوبة،
إنت بقيت جاهز تدخل "القدس" وتتمتع بجمال ربنا.

ربنا عاوز يقولك إن الوقوف قدامه محتاج "نضافة داخلية"
ومش سايبك لوحدك، ده مديك كلمته وسر التوبة كـ "مرحضة" دايمة في حياتك.

اطمن.. حتى لو غلطت، باب التوبة مفتوح،
والمية (النعمة) مالهاش حدود عشان تطهرك.
ربنا مستني يشوف صورتك نقية زي ما خلقك، ومستني يسمع صوتك وإنت بتقول:
"نقي قلبي يا رب"