منتدى الفرح المسيحى - قيمتك محفورة في قلب الملك اللي اختارك تكون في موكبه

آية مُحيّرة بس حكايتها بسيطة (نشيد الأنشاد)
"لقد شبهتك يا حبيبتي بفرس في مركبات فرعون..." 🐎👑

بعد ما ربنا رد على حيرة العروسة في الآية ٨ الآية اللي فاتت وقالها "امشي على آثار الغنم".

النهاردة في الآية رقم ٩ بيبدأ يرفع من روحها المعنوية، ويطمنها بوصف يبان محيّر في أوله:
"لقد شبهتك يا حبيبتي بفرس في مركبات فرعون"
(نشيد الأنشاد 1: 9)

شايفين التشبيه؟ بيشبه العروسة بـ"فرس"! 🤔
طبعاً التشبيه هنا مش لامرأة، لكنه خطاب لـ"النفس البشرية" (أنا وأنت).
. لأن في الحقيقة مفيش عريس بشرى هيغازل عروسته بوصف زي ده..
لكن ربنا بيخاطب نفسنا بلغة مفهومة في وقتها.

الحكاية بتبدأ بأن "خيول مصر" في الوقت ده كانت هي الأغلى والأقوى في العالم كله.. 🌸

فلما ربنا يشبه "نفسك" بفرس في مركبات الملك، هو بيقولك:
"أنت في نظري غالي جداً، ومقامك ملوكي، ومكانك مش في الهامش،
أنت في قلب موكب النصر".

والنفس البشرية في علاقتها مع ربنا زي الفرس الأصيلة:
قوية بنعمة ربنا، وسريعة في استجابتها لصوته..
كأنه بيقولك:
"أنا مش عايزك نفس مكسورة أو مستسلمة للهموم، أنا عايزك قوي،
بتجري ناحيتي، وبتغلب أي تعب بقوة الروح اللي فيك".

وحتى "اللجام" اللي بيقود الفرس.. 🛡️
ده مش تقييد، لكنه "رعاية ملكية"..

ربنا بيقول لنفسك:
أنا اللي ماسك لجام حياتك وبقودك لبر الأمان".

فا هنا الحكاية بسيطة ومطمئنة..
لما تحس إنك "قليل" أو إن الدنيا جاية عليك،
افتكر إن ملك الملوك بيخاطب "نفسك" ويقولها: "أنتِ في عيني بطلة،
وأصيلة، ومكانك في الموكب الملكي بتاعي".

وساعتها بس هتفهم إن:
جمالك الحقيقي في إنك "مخصص" لربنا وبس..
وإنك مش محتاج تدور على قيمتك عند حد،
لأن قيمتك محفورة في قلب الملك اللي اختارك تكون في موكبه.