منتدى الفرح المسيحى - أبطال فى الظل

النهاردة هنتكلم عن بطل علّمنا يعني إيه "بيوتنا تكون أمان" 🏠❤️
الشيخ "راعوئيل"

كلنا طبعاً عارفين قصة "سارة" والـ 7 أزواج اللي ماتوا،
وعارفين "طوبيا" البطل اللي ربنا أرسله عشان ينقذها بمساعدة الملاك رافائيل..

لكن إحنا النهاردة هنرمي الضوء على بطل ظل حقيقي
كان واقف في ضهر بنته طول السنين دي..
"راعوئيل" (أبو سارة)

البطل اللي علمنا إن الأب الحقيقي
هو اللي بيفضل ساند ولاده في أصعب ظروفهم،
حتى لو العالم كله حكم عليهم بالفشل أو "النحس".

وقبل ما نبدأ... حكايتنا جاية من "سفر طوبيا"
وهو واحد من "الأسفار القانونية الثانية"
اللي بتعلمنا إزاي ربنا بيعتني بالعائلات.

تخيل معايا بيت راعوئيل كان عامل إزاي؟
بنته الواحيدة،
وكل ما تتجوز، جوزها يموت في ليلة الفرح! الناس بدأت تتكلم،
والجيران بيبصوا لها بكسرة،
والحزن مالي المكان.

لكن هنا بيظهر راعوئيل كـ "بطل ظل"
حقيقي، لأنه مكسرش بخاطر بنته ولا لامها،
بل كان هو "الحضن" اللي شايل وجعها ومستني رحمة ربنا.

ولما جه "طوبيا" يطلب إيدها،
راعوئيل مكنش بيدور يخلص من "هم" بنته،
بالعكس، ده كان صريح جداً وخايف على حياة طوبيا
وقاله بكل أمانة: 👇🏻
«لاَ أَشك أَن اللهَ قَدْ قبِل صَلَواتِي وَدُمُوعِي أَمَامَهُ،
وَإِني لأُومِن أَنه إِنما لِأَجْلِ ذلِكَ جَعَلَكُمْ تَأْتُونَ إِلَيَّ لِتَتَزَوَّجَ
هذِهِ بِقَرِيبِهَا عَلَى حَسَبِ شَرِيعَةِ مُوسَى.. فَالآنَ لاَ تَشُكَّ أَنَّهَا تُسَلَّمُ إِلَيْكَ.»
(سفر طوبيا 7: 14-15)

وفي أصعب لحظة، ليلة الفرح والكل قلقان،
راعوئيل كان بيصلي من كل قلبه في الخفاء.

ولما ربنا استجاب وشاف بنته فرحانة وزوجها بخير،
كانت أول كلمة على لسانه هي تسبيح ربنا بكل شكر: 👇🏻
«فَبَارَكَ رَاعوئِيلُ الرَّبَّ قَائِلاً: نُبَارِكُكَ أَيُّهَا الرَّبُّ إِلهُ إِسْرَائِيلَ
، لأَنَّهُ لَمْ يَحْدُثْ كَمَا ظَنَنَّا؛ فَإِنَّكَ قَدْ صَنَعْتَ بِنَا رَحْمَتَكَ،
وَطَرَدْتَ عَنَّا الْعَدُوَّ الَّذِي كَانَ يُطَارِدُنَا.»
(سفر طوبيا 8: 17)

ومن كتر فرحته بستر ربنا ونجاة بنته،
عمل فرح لبنته استمر 14 يوم،
ووزع نص أملاكه لبنته في حياتها،
لأنه شاف إن فرحة بنته ورد اعتبارها هي المكسب الحقيقي
اللي يستاهل كل غالي،
زي ما بيقول السفر: 👇🏻
«وَأَمَرَ رَاعوئِيلُ أَنْ يُقِيمُوا الْعُرْسَ أَرْبَعَةَ عَشَرَ يَوْماً..
وَصَنَعَ رَاعوئِيلُ كِتَاباً بِإِعْطَائِهِ نِصْفَ مَا يَمْلِكُ.»
(سفر طوبيا 8: 20-24)

قصة راعوئيل بتقولنا النهاردة ...
إن الأب الحقيقي هو اللي بيستر ويصلي ويشجع،
وبيكون مصدر طمأنينة لأهل بيته مهما كانت الظروف صعبة.

ربنا عاوز يقولك من خلاله..
إن البيوت اللي بتتبني على الصلاة والاحتواء والرضا،
مفيش شر يقدر يكسرها،
وإن أمانتك في حبك لبيتك هي بطولة حقيقية في عينين ربنا.

أبطال_الظل
راعوئيل_أبو_سارة
سفر_طوبيا
الأسفار_القانونية_الثانية