منتدى الفرح المسيحى - بتعرف تراجع نفسك

أغلبنا، كان في آخر السنة ومع بداية سنة جديدة،
بيكون متحمّس لحاجات كتير. أي نعم مش كلها بتتعمل،
ومع مرور أوّل شهر في التاني،
بندخل في حالة فتور، وزهوة البدايات بتقلّ.

لكن دلوقتي، يمكن مع مرور الأيام وكِبر المسؤوليات
وروتين الحياة السريع، ما بقناش قادرين
نوقّف عجلة الحياة ونفكّر: "إحنا عملنا إيه؟ ونفسنا نوصل لفين؟"
فيه حالة أشبه بالفتور واللامبالاة اتسلّلت جوّه قلوبنا.

أنا بشجّعك مش علشان بداية سنة جديدة،
لكن في كل مرّة تحسّ إنك استُنزفت ومكمّل
علشان لازم تكمّل، إنك تقف وتدّي نفسك هدنة.

تفكّر في اللي فات.
تراجع نفسك، مبادئك، علاقاتك.
إيه اللي أنت مؤمن بيه وبتمشي وراه؟
علشان تفضل واعي وبتكبر وبتتغيّر لأحسن نسخة منك.