منتدى الفرح المسيحى - لو نَفسَك تِعبِت وانهارِت واتقَلبِت كلّ العِمدان

https://upload.chjoy.com/do.php?img=194068

لو نَفسَك تِعبِت وانهارِت
واتقَلبِت كلّ العِمدان
فِيه فكرَه عن قلبك تاهِت
أنا ربَّك ليَّ السُّلطان
أنا ع العَرش وإيدِي قديرَه
مهما بيِحصَل مهما ان كان
كلّ صعابَك عَندي يسيرَه
إستنَّاني بكلّ إيمان

هاضمَن راحتَك طول أيَّامَك
شِبَعَك بيَّ وعَندي خلاص
مهما الواقِع بان قُدَّامَك
إعلِن ثقتَك فيَّ أساس

مِش هانسَى لَك كلّ صلاتَك
أنا شُفت دمُوعَك في عينيك
أنَّاتَك وَصَلِت وآهاتَك
أنا حاسِس بالضَّغط علِيك
أنا عارِف إيه الِّلي علَى اكتافَك
أنا حاسِب حِملَك مظبوط
وهاجهِّز منفَذ قُدَّامَك
إرمِي عليَّ كلّ ضغُوط

وف ضِيقتَك دايمًا باتضايِق
وف حُزنَك أنا بِيك دريَان
بسّ ف حُبِّي هافُكّ وابارِك
وهانَجِّي كلّ الأيام
زيّ ما إبن أبوه بيشِيلُه
طُول السِّكَّه لو تعبَان
إنتَ ف حِضني يا ابني مكانَك
وف قلبي رحمَه وإحسان