تركونا على إيماننا…
تركونا نعيش إيماننا ببساطة.
تركونا على شويّة عادات حلوة ورّثونا ياها جدودنا.
تركونا بقلوب بسيطة تستقبل يسوع الليلة.

مبلى… الليلة رح يمرق يسوع.
مبلى… الليلة رح تنحني كل الأشجار.
مبلى… الليلة بدي أعجن خميرة وعلّقها برّا،
لآكل منها طول العمر،
لأن يسوع مرق وكبّ خميرته عليها.

مبلى… الليلة بدي حط مصاري بالعجينة،
مش حبًّا بالمال،
بس لأن ستّي كانت تعمل هيك،
وتساعد الفقرا،
والله عطاها.

ودق جراس
ونقدّس ونجدّد سرّ المعمودية،
ونتبارك،
ونسلم كل حياتنا ليسوع،
ونساعد الفقير والمريض والمحتاج،
ونعيش بحسب الوصايا وكلام الإنجيل،
وكهنة تبشّر جيل بعد جيل…
الايمان مش فلسفة بل عجينة مربوطة بشجرة ليمرق الدايم دايم…
الايمان بساطة وقناعة وثقة بالرب…
ما بدنا عيد يصير عالموضة، بدنا عيد عالركعة والدمعة…
دايم… دايم.

الاب فادي روحانا
كتاب دقة قلب في مكتبة مار شربل عنايا