لما يوسف خلّف ابنه الأول سمّاه منسّى.
ومعنى الاسم ببساطة: "ينسّي".

يوسف في اللحظة دي كان بقى الرجل التاني في مصر بعد فرعون،
وصل لأعلى نقطة بعد سنين طويلة من الوجع، والخيانات
، والآلام، والسجن.
وسمّى ابنه منسّى لأنه قال:
"لأن الله أنساني كل تعبي."

وبصراحة…
أنا مؤمن إن في حياة كل واحد فينا فيه “منسّى”.
مش شخص… لكن زمن.
زمن ربنا فيه بنفسه "ينسّيك" كل اللي وجعك
، كل اللي كسرك، كل اللي تعبك.

وده - بشكل أو بآخر - خبرتي أنا كمان مع ربنا.
وشايف إنها حقيقة روحية
بيتشارك فيها كل اللي ماشيين السكة معاه:
إنه في وقت… بييجي الزمن اللي ربنا يعوّض، ويداوي، ويُنسي.

وبصلّي لك…
إن ييجي عليك الزمن اللي تقول فيه:
"أنساني الله كل تعب، وكل ألم مرّيت بيه."🤍