منتدى الفرح المسيحى - خير ربنا موجود على طول الحمدلله

يرضيك يارب كلمة الظالم تعلا على كلمتك

كان مفيش فى البيت غير ١٠٠ جنيه بس وكنت شايلها للكهرباء لأنها متأخره ٣ شهور لم يأتي المحصل وحايفه يجي فى وقت قولت أشيلها مع أنها مش هتكفى أصلأ كهربة ٣ شهور .... وفى بوم حضر فجأه رجل طيب أعرفه فتحت ودخل وقدمت له عصير من الحر وسبته يرتاح وقالى معلش انا جايلك فى طلب قولتله اتفضل قول قالى مفيش معايا جنيه والبيت فاضى ورحت لأخواتى وناس اعرفهم أستلف منهم لغاية ما اقبض المعاش ولكن معرفتش وجتلك علشان اشترى أكل وعيش للبيت ولما أقبض المعاش هرجعهم...
بدون تفكير قمت وأديته ال ١٠٠ جنيه قالى مش هتكفى قولتله دى اخر فلوس معايا فى البيت وكنت شايلها للكهرباء المتأخره ومش عارفه هتيجي كام ربنا يستر ويتأخر لغاية اول الشهر خد الفلوس واعطيته زجاجة عصير مقفوله كبيره لأولاده وفرح ومشي ... وانا قاعده قولت ياريتني كنت اديته ٥٠ ج وخليت ٥٠ علشان اى ظروف تنفع لأول الشهر وبعدين قولت خلاص رزقه ربنا يدبرها لأول الشهر ...
فجأه شىء قوى صوت داخلى جوايا بيقولى أقوم اجهز ورق النقابه مع انى مش ميعادها خالص ... المهم قمت اشوف الورق بعد ما الراجل مشى بحوالي ساعه دورت ولقيته
بفتح الورق لقيت جواه ١٥٠ جنيه كنت نسياهم مع الورق. .
فرحت جدأ بالفلوس اللى لقيتها وشكرت ربنا فعلأ مش بيبات مديون لحد .... يحصل ايه تانى بقى
اتفاجأت جرس الباب بيرن لقيته محصل الكهرباء
قولت استر يارب هاقوله هدفع فى الشركه اول الشهر أو لو هيعدى تانى ..... المهم
لقيته بيقول انا جاى لتحصيل ٣ شهور متأخره والفواتير جابه عاليه للعمارة كلها نتيجة التأخير لحدوث مشكله عندهم بالشركه .... وكأن معاه البواب بيلف على الشقق
قولتله طيب انا عليه كام قالى ١٠٠ جنيه قولتله أزاى ده
دى كهربة شهر ولا قصدك ١٠٠٠ جنيه
قالى ١٠٠ جنيه لل ٣ شهور بقيت مش مصدقه
دفعت ال ١٠٠ جنيه من الفلوس اللى لقيتها وأخدت الايصال..
أتبقى ٥٠ جنيه نزلت أشتريت طلبات بسيطه للبيت وعيش
وانا فرحانه.... شكرت ربنا انه سترها معايا لغاية اول الشهر .
بركة الرب تغني ولا ينقص معها شىء
المعطي المسرور يحبه الرب ....
لك كل الشكر يارب .... خير ربنا موجود على طول الحمدلله.