منتدى الفرح المسيحى - حبه و ابعد عنه

زي النار ، كل ما تقرب منها تتحرق و تنكوي و تتشوي
.. طبعه كده و هو عارف و انت عارف و كله عارف ..

انا عارف انك حاولت تقرب كتير
، لكن كمية الإهانات النفسية اللي عملهالك
حفرت في قلبك مشاعر مكسورة لغاية دلوقتي بتصل جواك ..

فيه ناس كده ، ماعندهاش مشاعر زي بقية الناس .
. يجرح و ينسي و يقسي .. حساباته راحته
، و ترتيباته مصلحته.. عقله بيلف حوالين مكاسبه
.. حطه في النصايح تلاقيه رهوان بهلوان،
و تعال لكلامه دبش و رزع،
و بص لعمايله تلاقيها قسوة و عنف..

جرب تعاتبه يمسح بيك الشارع
، جرب تناقشه لا تاخد منه لا حق و لا باطل .
. طلباته أوامر و جواهر
، و طلباتك لا ليها حساب و لا جواب ..
كل اللي تديهوله يعتبره حق طبيعي
، و لو مرة نسي و اداك يبقي دين يعايرك بيه و يمن بيه عليك ..

انا عارف انك جربت معاه كل الطرق
، لا عتاب نافع و لا احسان نافع ، و لا لطف نافع ..
في الاخر مش ح تلاقي غير المعادلة دي
: حبه قوي و صلي له قوي قوي
، و ابعد عنه عنه قوي قوي قوي ..

و لو كان قدرك ان البعد مش نافع
، في الشغل أو العيلة أو الجيرة او العشرة
، يبقي برضه تبعد بالراحة و بالحكمة
، من غير ما تحسسه أو تشرحله أو تقاوحه .
. اعمل الحد الادني من العلاقة ،
و انسحب بالراحة علشان يحس و يتعدل
، و ربنا قادر علي المستحيل..

بس علي الاقل تحمي مشاعرك من النار اللي ياما حرقتك..

و ده علي فكرة مش ضد المحبة .
. لان الحب حاجة و الاستمرار فى العشرة اللصيقة
مع حد بيوجعك حاجة تانية خالص ..