منتدى الفرح المسيحى - عايز تعرف الله اعرف الرب يسوع

واحدة من أكتر الصور المشوّهة عن الله
هي إنَّه إله مجهول، بعيد، ساكن في السما،
ومحدّش يقدر يوصله أو يعرفه.
ولا حد شافه، ولا حد فاهمه، ولا حد يقدر يتخيله.

سألت نفسك قبل كده:
"هو أنا باعبد مين؟" "باعرفه فعلًا، ولا لأني اتولدت
لقيت اللي حواليا بيعبدوه… فعبدته؟"
"هو مين أصلًا؟ وليه باعبده؟"

السؤال ممكن يكون بيخوّف شوية، بس لازم يتسأل.
والحقيقة إن الله مش مجهول، ولا بعيد.
الله أعلن نفسه لينا بكل وضوح،
من خلال شخص واحد: هو الرب يسوع.

الكتاب المقدّس بيقول: "اَللهُ لَمْ يَرَهُ أَحَدٌ قَطُّ. اَلابْنُ الْوَحِيدُ
الَّذِي هُوَ فِي حِضْنِ الآبِ هُوَ خَبَّرَ." (يو 1: 18)

الله أخذ صورة إنسان ونزل وسطنا.
عاش زينا، وشاركنا التعب والوجع والاحتياج.
مابقاش بعيد… بقى قريب جدًا.
دلوقتي لو عايز تعرف الله، بصّ على الرب يسوع.
افهم طبيعته من تصرفاته.
شوف رد فعله قدّام الغلط، والضعف، والخوف.
سمع لمين؟ ووقف مع مين؟
حب الناس إزاي؟
شفاهم إزاي؟
قدّم نفسه ليهم إزاي؟
يسوع هو "الله المُعْلَن". هو قال عن نفسه:
"اَلَّذِي رَآنِي فَقَدْ رَأَى الآبَ، فَكَيْفَ تَقُولُ أَنْتَ: أَرِنَا الآبَ؟" (يو 14: 9)

عايز تعرف الله؟ اعرف الرب يسوع.
بصّ عليه… هتعرف قلب الله شكله إيه.