منتدى الفرح المسيحى - نقوا كلامكم علشان ماتخسروش اللي حواليكم

وصلت الهاند فري في التليفون علشان اسمع حاجه
وللاسف لقيتها ماشتغلتش
فقولت اشيلها واوصلها تاني
الغريب لما شيلتها لقيت حته من الجزء المعدن اللي بيدخل من السماعه للتليفون اتخلع واتحشر جوه التليفون

جيت اشغل فيديوهات لقيتها ماطلعتش صوت
لان التليفون قاري ان فيه سماعه متوصلة
وعلشان التليفون يقدر يخرجلي صوت من جديد
كان لازم احاول اعالج المشكله دي الاول
واشيل اللي اتحشر جواه

انت تعرف ان اغلب مشاكلنا مع اللي حوالينا
وانقطاع التواصل مابينا بيكون سببه كده
كلامهم الدبش اللي بيتحشر في وداننا ومابيهتموش
يشيلوه او يعتذروا عنه

بيتبني وقتها حاجز مابينا ، مهما اتكلموا لا بنقدر نسمعهم
ولا نتواصل معاهم من جديد
احنا مش سبب ، احنا رد فعل

لو دورت ورا اي علاقه صابها الفتور هتلاقي السبب كلمه
كلمة مالهاش لازمه اتقالت وسابت اثر

نقوا كلامكم .. علشان ماتخسروش اللي حواليكم