منتدى الفرح المسيحى - أنا ليّا شرف إني أخدمك وإنك تناديني وسط الميّة

https://upload.chjoy.com/uploads/174845820524421.jpg

يا رب
أنا لسه مش مستوعب…
إزاي من وسط الكتير اخترتني؟
من وسط الميّة، من وسط الزحمة
، من وسط اللي أحسن مني وأسبق
لقيت صوتك بينادي عليّا… باسمي.

كان واضح… قوي
مفيهوش لُبس، مفيهوش صدفة
كأني أنت اللي بتقولي: "أنا شايفك… وعايزك ليا"

يا رب، أنا حسّيتك بتاخد بإيدي
بتقربني، وبتفتح ليا باب الخدمة
كأنك بتقولي: “أنا محتاجك، حتى بضعفك، حتى بكسرك”

صوتك دخل قلبي
ماكانش بس نداء… كان طبطبة
كان إعلان حب، واختيار، وثقة مش مستاهلها
بس انت إدّتهالي

خليني أعيش مستحق للدعوة دي
خليني أفتكر دايمًا إنك اخترتني مش لأني الأفضل
لكن لأنك بتحب… وبتصنع من الطين إناء ليك

خليني أسمع صوتك كل يوم
بنفس الوضوح… بنفس الحنان
وافضل دايمًا مستعد أقولك "نعم"،
وأمشي وراك، زي ما أنا، وإنت تصلّح فيا الطريق

أنا ليّا شرف إني أخدمك
وإنك تناديني وسط الميّة،
وتقولي: “تعالى… أنا عندي مهمة ليك”.

آمين.