منتدى الفرح المسيحى - الشيلة شيلتك لوحدك

"الشيلة شيلتك لوحدك"
جملة تقيلة، بس مع الوقت بتفهم إنها مش بس واقعية
… دي الحقيقة اللي هاتفضل تتأكد منها كل ما تقع.

هاتعدي عليك مواقف، تبص حواليك تفتكر إنك محاط بناس،
بس أول ما تقع… هاتلاقيهم بيتفرجوا،
ولا حد بيشيل، ولا حد حتى بيطبطب.
اللي كنت فاكرهم سند… طلعوا ريح،
واللي كنت شايلهم في عينيك… اختفوا وقت ما احتاجت نظرة بس.

هتحس وقتها إنك لوحدك في الدنيا،
وإنك لازم تتعلم تقوم نفسك بنفسك،
تمد إيدك لنفسك، تسند روحك، وتكمل.
وهتعرف إنك كنت بتستنى كتير من ناس ماعندهاش حتى نية.

الحياة مش دايمًا بتظلمك، أوقات بتفوقك،
بتقولك: فوق، محدش ليه عند حد،
واللي بيغرق وبيستنى حد ينقذه، بيتسحب لتحت أكتر.

اعرف قيمة نفسك، وسند نفسك…
لأن الضهر الحقيقي مش الناس…
الضهر الحقيقي هو قلبك اللي مابيكسركش
وعقلك اللي بيصحيك
وإيمانك اللي بيقومك من غير ماتحتاج لحد.

اعرف إنك أقوى مما تتخيل،
وأوعى تفضل مستني حد يشيلك…
لأن الشيلة، طول عمرها شيلتك لوحدك.

°