منتدى الفرح المسيحى - اتلمّ المتعوس على خايب الرجا

“وَاجْتَمَعَ إِلَيْهِ كُلُّ رَجُل مُتَضَايِق، وَكُلُّ مَنْ كَانَ عَلَيْهِ دَيْنٌ، وَكُلُّ رَجُل مُرِّ النَّفْسِ… فَكَانَ عَلَيْهِمْ رَئِيسًا.” (صموئيل الأول ٢٢: ٢)

تخيل إن دا كان شكل أول جيش اتكوّن حوالين داود👀
ناس مضغوطة، مديونة، مكتئبة، ومخنوقة!
يعني زي ما بنقول: "اتلمّ المتعوس على خايب الرجا."

بس داود، نفسه، اللي كان هربان من شاول ومش في أحسن حالاته…
اختار يكون قائد ليهم، مش بس باللقب ..
لكن بالحُب، والحكمة، والقيادة اللي تقدر تِشيل وتشجّع وتبني💪

الغريب، إن الناس دي اتحوّلت…
نفس الـ ٤٠٠ اللي كانوا مضطربين،
بقوا في يوم من الأيام أبطال داود،
اللي انتصروا وكتب بيهم تاريخ!

عارف السر في ايه؟👌
إن قبل ما داود يقودهم، راح لبيت الرب
( في الاصحاح اللي قبل الاية دي)
افتكر إن اللي ساعده زمان… هو هو اللي لسه معاه دلوقتي.❤️

عايز أشجعك، حتى لو حواليك ناس محبطة، متعبة، فاقدة الشغف…
إوعى تستصغر اللي في إيدك. افتكرت انتصاراتك القديمة،💪
تقدر تكون قائد لناس مكسورة…
وتشوف بيهم نصر جديد🎵
ربنا بيخلق من اليأس جيش.
ومن الحزن بطولات.
ومن الهاربين… ملوك👑👑

اتشجّع، واتشدّد 🙏🏻
وخلّي رجاءك في اللي يقدر يخلق من الفُتات… مجد."