منتدى الفرح المسيحى - علّمني أكون خادم ليك مش مجرد متكلم عنك

يا رب..
علّمني أكون خادم ليك..مش مجرد متكلم عنك..
مش عايز أكون حافظ آيات وناس شايفاني "فاهم"..
بس أنت شايف قلبي بعيد مليان دوشة وواقف على بابك مش قادر يدخل..
أوقات بتوه وسط التفاصيل..
بجهز لاجتماع بكتب تأمل بساعد غيري..
بس مش باجي أقعد معاك..
وأرجع أسأل ليه الخدمة بقت تقيلة وليه الكلمة بقت ناشفة!!
إديني نعمة أعيش اللي بقوله..
نفّض قلبي من الدوشة ومن الزيف..
واملاني بحبك اللي بيغيرني قبل ما يغيّر حد تاني..
خلي كل مرة أتكلم فيها عنك..
أكون أنا أصلاً راجع مليان بيك..
آمين..