زوادة اليوم :

هديّة الملك للفلاح
https://upload.chjoy.com/uploads/175090860463821.jpg
بيخبرو عن فلاحين كانو عم يشتغلو بالحقلة لـمّا سمعو صوت موسيقى من بعيد، شوي شوي صار الصوت يقوى، بالآخر إكتشفو إنّو الملك والحاشية جايين حتّى يزورو ضيعتُن وحقولُن.
ما عرفو الفلاحين كيف بدّن يعبّرو عن فرحتُن بزيارة الملك، والمفاجأة كانت لـمّا فلاح، ركض ع نبع الميّ، ملّا إيديه وقرّب من الملك وقلّو: «يا جلالة الملك تقبّل هالميّات هديّة منّي».
تعجّب الملك وسألو: «شو هيدي الهديّة؟» جاوب الفلاح: «جلالة الملك، الفرح ملّا قلبي لـمّا قرّبت من حقلي وهيدي أوّل مرّة بشوفك، ومنّي قادر عبّرلَك عن حُبي وعن فرحي، قلت شو بدي قدّملك إنت الغني وأنا الفقير يلّي ما بيملك إلا القليل وما في عندي شي قدّملك ياه، فقلت بقدّملك هالميّات مش لإنّك محتاج، بس هيدا الشي الوحيد يلّي بقدر إعملو، تقبل هالميّ جلالة الملك علامة لقلب بيحملّك كل المودّة والحب...»
فرح الملك بالفلاح وغمرو وقال لرئيس الخزانة: «عطيه هالفلاح مبلغ كبير من المال لأنّو يلّي قدّمو هوّي أكبر من يلّي قدّموه فلاحين كتار».

الزوّادة بتقلّي وبتقلّك:

«مش مهم شو بتعطي، الأهم كيف بتعطي، ما تفكّر بالكميّة فكّر ع طول بنوعية العطاء».
والله معك.