منتدى الفرح المسيحى - علّمني أكون صادق زي بولس

يا رب،
أنا مش عايز أعبدك بكلام شفايفي بس…
ولا أبقى موجود في الكنيسة بجسمي، وقلبي بعيد.

بولس قالها بمنتهى الصدق:
"أعبدك بروحي"…
يعني من جوايا، من أعماق قلبي،
مش لأن الناس شايفة،
ولا عشان واجب…
لكن عشان أنا حابب أكون ليك.

أنا كمان يا رب عايز علاقتي بيك تبقى حقيقية،
من جوّا، مش مظهر بس،
عايز إنجيلي يبقى حياتي،
مش كتاب بقراه وبقفله…
يبقى أسلوب عيشتي، وريحة كلامي، ومصدر رجائي.

علّمني أكون صادق زي بولس،
أعبدك من كل قلبي، مش بس بعيني في الصلاة،
ولا بودني في الترنيمة…
لكن بروحي كلها، بقلبي كله، بحياتي اللي بين إيديك.