منتدى الفرح المسيحى - حتى لو لسه مش شايف الإجابة أنا واثق إن الاستجابة جاية

في وقت من الأوقات، كنت بحس إني بكلم ربنا، بس مافيش رد!!
بصرخ جوايّ، وكأن الصوت بيترد لي ومابيعديش السقف!!
أسئلة كتير كانت بتزن في دماغي:
"يا رب، إنت سامعني؟ شايفني؟
ليه ساكت؟ ليه مش بتتحرك؟
وفي وسط الحيرة والسكوت... وقعت عيني على الآية دي:
إِنِّي قَدْ رَأَيْتُ مَذَلَّةَ شَعْبِي.. وَسَمِعْتُ صُرَاخَهُمْ ..
فَنَزَلْتُ لأُنْقِذَهُمْ .. (الخروج ٣: ٧، ٨)
فضلت ساكت قدام الكلمات دي شوية...
واكتشفت إن ربنا مش ساكت زي ما كنت فاكر.
هو شايف، وسامع، وعارف، ونازل علشاني.
آه، يمكن مش بيشتغل بالسرعة اللي أنا عايزها.
يمكن مش بالطريقة اللي أنا متخيلها.
بس الحقيقة اللي قلبي اتعلّق بيها من جديد:
مافيش دمعة بتنزل من غير ما يلاحظها،
ومافيش صرخة مش بتوصله👌
أنا مش صوت بيضيع في الهوا...
أنا ابن محبوب،
وإلهي حي، وسامعني، وبيشتغل في الخفاء علشاني✨️
حتى لو لسه مش شايف الإجابة…
أنا واثق إن الاستجابة جاية،
لأن إلهي يرى، ويسمع، ويعمل لأجلي💜