منتدى الفرح المسيحى - أنا مش دايمًا غلط

صدقتهُم لما قالوا إنك صعب،
وإنك غريب، وإنك بتبالغ،
وإنك دايمًا اللي غلط.

فيه ناس بتعرف تحوّل أي موقف لصباع اتهام في وشك،
بيتكلموا كأنهم يملكوا حقيقتك،
بس الحقيقة؟ هما مراية مكسورة…
بتشوّه صورتك، وبتكسرك وانت مش واخد بالك

الشك في النفس مش بيجي فجأة، ده بيتزرع واحدة واحدة.
كلمة هنا، نظرة هناك، لوم من غير تفسير

مواقف كتير خلتك تقول لنفسك:
يمكن أنا فعلاً المشكلة…

الوجع مش دايمًا دليل إنك غلطت،
وألم غيرك مش دايمًا انت سببه،
فيه ناس بتوجع… وتتهمك إنك انت اللي وجّعت.

فوق لنفسك…
انت مش مراية لآراء الناس،
انت مش صورة مشوشة لتجاربك او تجاربهم القديمة،
انت إنسان، بتحاول… وبتتعب…
ويمكن تغلط، بس ده ما يمحيش حقيقتك.

خد خطوة لورا…
واسمح لنفسك تقول:
“أنا مش دايمًا غلط."