منتدى الفرح المسيحى - ساعدني أتبعك تمامًا

في ناس أسهل لها تختار تمشي مع التيار،
وفي ناس بتختار الطريق الأصح والأصعب.
كالب كان منهم.

وسط جيل مليان تذمُّر وخوف وتراجع،
وقف هو بإيمان وقال:
وَأَمَّا أَنَا فَاتَّبَعْتُ تَمَامًا الرَّبَّ إِلهِي. (يشوع ١٤: ٨)

وعده الرب… وانتظر.
عدّت سنين طويلة، بس قلبه ماغيّرش الاتجاه.
ماتعبش، مانساش، ماساومش.
ولما جه وقت الوعد، كان لسه واقف بنفس الحماس:
كما كانت قوتي حينئذ، هكذا قوتي الآن..

مش لأنه أقوى من غيره…
لكن لأنه كان متعلق بإلهه بكل قلبه.
فاتبع تمامًا… فوصل للتمام.

يمكن الطريق مع الرب مش دايمًا سهل
، بس لو فضلت تابع الرب "تمامًا"
هتشوف وعوده، وهتعيش قوته، وهتكمل للآخر.

يا رب، ساعدني أتبعك تمامًا…