منتدى الفرح المسيحى - بصيت للسما وسكت

https://upload.chjoy.com/uploads/174574440308651.jpg

بصيت للسما..
وسكت.

مفيش كلام كفاية،
ولا دموع تشرح،
ولا صوت قادر يطلع كل اللي جوايا.

بصيت وقلت:
“يارب..
في حاجات ملهاش حل..
ولا فهم،
ولا منطق.”

في حاجات..
مفيش غيرك يقدر يشيلها من على القلب،
مفيش غيرك يقدر يلمّ كل الكسور اللي جوه روحي.

انت بس اللي تقدر تريحني.
انت بس اللي شايف الوجع من قبل ما أنطقه،
وحاسس باللي محدش شايفه.

فـ أنا سايب كل حاجة عندك..
الحيرة، والخيبة، والخوف، والانتظار الطويل.

سايبهم تحت رجليك..
ومستني..
تلمس قلبي الضعيف بسلامك اللي ملوش مثيل.

يارب، ريحني..
زي ما وعدت إنك قريب،
وزي ما أنا مصدق إنك قادر.