منتدى الفرح المسيحى - أنا العيد اللي ما بيتلغيش

https://upload.chjoy.com/uploads/174511525618091.jpg

فيه ناس بتعدّ الأيام مش علشان مستنيين العيد..
بيعدّوها علشان تخلّص.
بيتحاشوا الزينة.. بيقفلوا السماعات..
وبيحاولوا يقنعوا نفسهم إن “ده يوم زي أي يوم”.
بس هو مش زي أي يوم..
هو زي الوجع اللي اتكرّر.

يا يسوع..
في العيد اللي الناس بتتبادل فيه الهدايا،
في ناس مش لاقية حد يفتحلها باب..
في ناس نسيوها،
وفي ناس افتكروا غياب حد مكانه ما بيتملاش.

ادخل بيوتهم يا رب.. حتى لو قفلوها..
ادخل بقلبك اللي بيحضن بدون شروط،
وادّيهم العيد اللي مالوش علاقة بزحمة الناس،
ولا بالأصوات العالية..
ادّيهم سلام.. ساكت.. بس شافي.

وخلّيهم يحسوا إنك بتعدّي عليهم مخصوص،
بتطبطب، وبتقولهم:
“أنا معاك في كل عيد ما احتفلتش بيه..
أنا العيد اللي ما بيتلغيش.”