منتدى الفرح المسيحى - مش كل حد هيكون يوناثانك

https://upload.chjoy.com/uploads/174223931730881.jpg

مش كل صديق يبقى يوناثان،
ومش كل عشرة تبقى عهد…
في ناس بتدخل حياتك زي ظل بيظهر وقت النور
ويختفي في العتمة، وفي ناس بتفضل ثابتة
حتى لو الدنيا كلها قامت عليك.
الصديق اللي زي يوناثان مش بس اللي بيسندك،
لكنه اللي بيشوف فيك الملك وأنت لسه راعي غنم
، اللي يشوف دعوتك
حتى لو كل اللي حواليك شايفينك شخص عادي.

يوناثان مكانش بس صاحب لداود، كان رابط سماوي
، شخص كان ممكن يهدّ في داود عشان ياخد مكانه
، لكنه اختار يثبّته عشان يوصله ليه.
الصديق الحقيقي مش اللي يخاف على مصلحته منك،
لكن اللي يفرح بنجاحك كأنه نجاحه،
اللي يبقى عارف إن طريقك مشيئة إلهية
، فيقف جنبك حتى لو كان المفروض يكون هو مكانك.

مش كل صداقة هتبقى زي دي،
ومش كل حد هيكون يوناثانك…
لكن لو لقيته، حافظ عليه، لأنه مش مجرد صديق،
لكنه جزء من خطة ربنا لحياتك، علامة من السماء
إنك مش لوحدك،
وإن العهد السماوي دايمًا أقوى من أي ظروف أرضية.