منتدى الفرح المسيحى - عيد الغطاس اسم لم يستخدمه آباء الكنيسة نهائيا

https://upload.chjoy.com/uploads/173728079049611.jpg

النهاردة الكنائس الشرقية بتحتفل بذكرى
معمودية المسيح في نهر الأردن..
واللي كتير من المسيحيين بيسموه "عيد الغطاس"
بس عاوز أقولك على حاجة صغيرة..
أنت تعرف إن آباء الكنيسة لم يستخدموا هذا الاسم نهائياً!؟
القديس غريغوريوس النزينزي مثلاً أطلق عليه "عيد الأنوار"
إشارة إلى استعلان المسيح في المعمودية
كالنور الحقيقي الذي جاء للعالم...
والقديس أثناسيوس الرسولي بيسميه "عيد الظهور الإلهي"،
الإبيفانيا أو الثيؤفانيا.. وبيشرح سبب التسمية دي وبيقول
"إنه اليوم العظيم الذي استعلن فيه ربنا يسوع المسيح
أمام الجمع كله".. وفي بعض التفسيرات بتقول إنه
بيسمى عيد الظهور الإلهي لأن فيه تم استعلان الثالوث
للبشر لأول مرة في العهد الجديد.. الآب متكلماً من السماء،
والابن متجسداً في نهر الأردن، والروح القدس نازلاً عليه
في صورة حمامة.. وغرض الإعلان ده ببساطة إن الله يقول
للبشر إنه أصبح ليهم فرصة للدخول في علاقة وعشرة معاه.
وده على أساس حاجتين مهمين:
١- إن الله كائن علاقاتي في ذاته منذ الأزل وللأبد،
وأكبر دليل على كده إن في علاقة موجودة بين الآب
والابن والروح القدس من قبل خلق الكون، وعلاقة الله بالبشر
ما هي إلا انعكاس لعلاقة الأقانيم ببعضها.

٢- إن مفيش أي إنسان يقدر يعرف الله أو يدخل
في علاقة معاه إلا من خلال شخص المسيح،
لأنه بتجسده وحياته شوفنا فيه محبة الآب، وبموته
وقيامته فتح لينا الطريق للآب السماوي.

كل عيد أنوار وأنتم مستمتعين بوجود النور الحقيقي في حياتكم،
وكل عيد ظهور إلهي وأنتم مستمتعين
بعلاقة وعشرة مع الله الثالوث..