منتدى الفرح المسيحى - زوادة اليوم: الغِشّ 2024/11/12

زوادة اليوم:
الغِشّ
https://upload.chjoy.com/uploads/173113296490261.jpg
بيخبّرو عن بيّاع ليمون، بتمرق حدّو ختيارة وبتسألو
إذا الليمونات المعروضين للبيع حامضين أو حلوين.

فَكَّر : أكيد هالختيارة بدّها ليمون حلو، بيقلّها هالليمونات حلوين،
وقال :

«كم كيلو بتحبّي لحتَّى زِنلِك»؟

بتقلّو الختيارة :

«بدّي إعتذر مِنَّك، أنا عَم فتِّش على ليمون حامض
، كِنّتي عَم تتوحَّم وبدّها ليمون حامض».

بيزعل البِيّاع لأنّو خسر الصفقة.

بعد وقت طويل، قرَّبِت من بيّاع الليمون إمرأة حامل،
وسألتو إذا الليمونات يلّي عَم بيبيعُن حامضين
أو حلوين، وبما أنّ المرأة حامل، الجواب كان على راس لسانو :

«أكيد حامضين، كم كيلو بزِنلك»؟

بتقول الستّ الحامل :

«مش على بالي إشتري من هالليمونات الحامضين
، حماتي بتحِبّ الليمون الحلو وما بتحِبّ الليمون الحامض».

كمان التاجر خسِر الصفقة مَرَّة تانية.

الزوّادة بتقلّي وبتقلَّك :

يلّي بيفكِّر بِخداع الآخرين بيكون عَم يخدع ذاتو
، خلّيني أنا وإنتَ نتذكَّر إنّو طابخ السمّ هوّي أوَّل مين بياكل مِنّو، والله معك.