زوادة اليوم:
الميكانيكي وطبيب القلب
https://upload.chjoy.com/uploads/173096032579131.jpg
بيخبّرو عن جِرّاح قلب كتير شهير، تعطَّلِت سيّارتو، أخدها على الكاراج لحتَّى يصلِّحها.

فتح المكانيكي غطا المحرِّك وبلَّش يفِكّ قطع من الموتور، مِنُّن يصلِّحُن ومِنُّن يستبدلُن بقطع تانيين.

قرَّب الطبيب لحدّ الميكانيكي ليشوف شو عَم بيصلِّح بالسيّارة، بكلّ إحترام بيقول الميكانيكي للطبيب :

«ممكن إسألك سؤال»؟

جاوب الطبيب بكلّ حذر :

«أكيد تفضَّل».

بيقول الميكانيكي :

«إنتَ بتعمل عمليّات للقلب، وأنا بعمل صيانة للسيّارات ولقلوبها بالتحديد، يعني متلي متلك، ليش إنتَ معك كتير مصاري وأنا إنسان فقير»؟

قرّب الطبيب من الميكانيكي وقلّو بكلّ هدوء :

«السبب كتير بسيط أنا بصلِّح بلا ما أطفي المُحرِّك، إذا بتقدر تعمل هالشي جرِّب».

الزوّادة بتقلّي وبتقلَّك :

في كتير أمور بالحياة بتتشابه قوالبها، إنَّما تفاصيلها الزغيرة كتير بتختلف، ما تفهم الأمور متل ما إنتَ بدَّك، سماع وجهة نظر الآخرين، يمكن هنّي يكونو على حقّ وإنتَ على خطأ، تقبَّل يلّي عطاك ياه الربّ، ما تستعجل بكرا، يمكن حاضرك يكون كتير أفضل، والله معك.