منتدى الفرح المسيحى - زواده اليوم : طبب نفسك 2024/10/31

زوادة اليوم:طَبِّب نفسَك

https://upload.chjoy.com/uploads/170210244162131.jpg

بيخبّرو عن مَرا إجت لعند المهاتما غاندي وقالتلو :

«إبني بياكُل كتير سِكَّر، وأنا بعرف هالشي بيضِرّ بصحتو، ممكن تنصحو إنّو ما بقا ياكُل سِكَّر»؟

إستمع غاندي للمرأة بعناية وفكَّر بالحلّ وطلب منها إنّو ترجع لعندو مع إبنها بعد أسبوعين ليحكي مع الصبي.

إستغربِت المرا ليش ما بيحكي دغري لحتَّى بَدّو ينَطُّرها أسبوعين، إنَّما أخدِت إبنها ورِجعِت على البيت.

بعد أسبوعين، إجت مع إبنها مَرَّة تانية متل ما طلب منها غاندي، يلّي تطلَّع بالصبي وقلّو :

«إنتَ بتاكل كتير سِكَّر، وهالشي بيضِرّ بصحتك».

هَزّ الصبي راسو ووعدو ما بقى يكتِّر أكِل سِكَّر.

حِيرِة الإمّ كبرِت كتير، وسألِت غاندي :

«ليش ما قِلتِلّو هالكلام لَمّا جينا لعندك من أسبوعين»؟

جاوب غاندي :

«بكلّ بساطة، من أسبوعين أنا كنت آكُل كتير سِكَّر».

الزوّادة بتذكّرني وبتذكّرك :

بكلام السيِّد المسيح :

«قبِل ما تشيل القشِّة من عَين خيَّك، شيل جذع الشجرة من عينك».

وكمان بتذكِّرني وبتذكّرك بالقول المأثور :

«أيُّها الطبيب طَبِّب نفسَك»، والله معك

.