منتدى الفرح المسيحى - زوادة اليوم: بيضة مسلوقة 2024/10/20

زوادة اليوم:
تأمل عجبني لابونا بولس جورج
بيضة مسلوقة!!

https://upload.chjoy.com/uploads/172931493876691.jpg
لما بتفكر انك تسلق بيض فى المية السخنة..
اوقات بتلاقي بيضة منهم اتكسرت و طلعت البياض
و الصفار بتاعها في مية السلق و باظت خلاص...
في حين ان باقي البيض إلي جمبها كويس جدااا و محصلهوش حاجة..
ازاي كده!!!!
تعالو نشوف
كل البيض محطوط في نفس الظروف( قصدي الحلة)..
كل البيض جاي من نفس الفرخة( كلنا بني ادمين)..
كل البيض محاط بالمية السخنة ( نفس المشاكل و الحياة)
فيه بيض متكسرش ..
وفيه بيض اتكسر وباظ..
المشكلة هنا مش في المية السخنة ولا الحلة ولا نوع البيضة
لا خالص..
المشكلة هنا في ان البيضة إلي كانت على النار
اصلا مشروخة فا متحملتش المية السخنة فا انفجرت و باظت..
انما البيض السليم الى ماسك نفسة لما اتعرض
لنفس الظروف و الحرارة فضل سليم زي ما هو..
دي حياتنا بالظبط..
لو من جواك سليم و كويس و اتحطيت في الظروف الصعبة
هتقدر تقاوم بل بالعكس..
الظروف دي هتحولك من بيضة نية ( انسان ني و ضعيف ) الى بيضة مسلوقة( جمدت وبقت قوية من جوة)..
انما لو من جواك مشرخ و تعبان و نفسيتك ضعيفة..
مع اي شوية ظروف صعبة هتتكسر و هتتشرخ
و هيكون السبب مش الظروف لكن هيكون السبب من جواك انت
( نفسك ايضا ناجحة) يعني مش مشرخة
ولا متبهدلة ولا مهترية ولا مبعزقة ولا متجرحة..
محتاجين نجمد شوية قبل ما نلوم الظروف انها بتلطش فينا
ما هي بتطلش في الناس كلها..
لكن مش كلهم بيتكسروا..
نقطة و من اول السطر.
قوينا بقوتك يا رب...
اسندنا برحمتك..
اعن ضعفاتنا و اصنعنا اناء صالحا كما يحسن في عينيك....
امين 😍😍😍