منتدى الفرح المسيحى - افرح بربنا وامشي ورا ربنا وارتاح

عارفين في كل ده نفسي اقول ايه ؟
اسف لكل شاب وشابه تايه في العالم ونفسه
بس يحس ان ربنا بجد بيحبه رغم خطاياه
وشايف قصاد عينه كله بيقطع في بعضه
اسف لكل شاب وشابه مكسورين ومطحونين ونفسهم
بس يخشوا يلاقوا كاهن يضحك في وشهم وخادم يعلمهم
وشاف قصاده كلام مش فاهمه مين ضد مين
اسف لكل شاب وشابه كل اللي بيتمناه يسمع كلمه رجاء تسند قلبه
وشاف قصاده حروب هو مش فاهمها
اسف لكل شاب وشابه عايشين دلوقتي في متاهه مين صح ومين غلط ونسيوا ان خلاص نفوسهم بيتوه وده مش زنبهم
كلمه من قلبي لكل شاب وشابه جوه الكنيسه
كنيستنا حلوه يا حبيبي
وربنا جميل وطيب
واساقفتنا وكهنتنا بيحبوا كلهم ربنا وكنيستهم من قلبهم
والبابا تواضروس اختيار ربنا وهو عظيم في إيمانه
وحكيم في إرشاده ولا يقبل اي استهانه بالتعليم
لكن تعالي أنا وانت نسيبنا من الزحمه دي أنا حاسس بيك عمال تسأل نفسك
هو في ايه ؟
مين مع مين؟
مين صح ومين غلط؟
عارف الاجابه ايه
هو الشيطان عاوز يناسيك أنا وانت ضعاف اوي وكلنا خطيه
ولسه نفسنا نتوب
ماتخافش علي الكنيسه لان الكنيسه لا أنا ولا غيري يقدر يغيرها
خاف علي نفسك اوي لان ممكن تبقي دمك حامي علي حاجات غير خلاص نفسك
فتلاقي نفسك الكل بيسقفلك وانا وانت في الاخر السما
دي مانشوفهاش
وفي الاخر اسفين يا شباب علي كل جرح
وتوهان حصلكم بسبب كلام في الميديا
كنيستكم حلوه
ربنا جميل
عندك كهنه وخدام بتحبهم وبيحبوك
عندك قداسه البابا تواضروس اب يا بختنا بيه
افرح بربنا وامشي ورا ربنا وارتاح
وماتبصسش غير في طريقك
احنا محتاجين نعمه تسندنا

ابونا جوناثان رفعت