منتدى الفرح المسيحى - زوادة اليوم: التجديف على إسم الربّ 2024/9/8

زوادة اليوم:
التجديف على إسم الربّ

https://upload.chjoy.com/uploads/172551385454261.jpg

بيخبّرو عن فلّاح كان كلّ يوم يجدِّف على ربنا
ويلعن إسمو، لَبيوم من الإيَّام بيقرِّر الربّ يبعَت ملاكو ليسألو
شو يلّي زاعجو، جاوبو :

«جاري عندو فِدّان مروَّض وبيساعدو لَيِفلح الأرض
وما بيعذّبو أبداً، وأنا عندي فِدّان بيعذِّبني طول الوقت وما بيطاوعني».

بيقلّو الربّ :

«ما تزعل رح أعطيك فِدّانَين مروَّضين، بيطيعوك وبيساعدوك،
شرط تبطِّل تتذمَّر وتجدِّف على إسم الربّ».

جاوب الفلاح وقلّو :

«بشكرك على العَرض بس أنا رح ضلّ إلعن
وجدِّف على إسمك لحتَّى تمَوِّت فِدّان جاري».

الزوّادة بتقلّي وبتقلَّك :

قدَّيش في ناس بعالمنا اليوم متل هالفلاّح؟

مش هدفها تنجح قدّ ما هدفها تشوف غيرها عَم يفشل.

مش هدفها تفرح، بس همّها تشوف غيرها زعلان.

خلّينا ما نسمح للغيرة تعمي قلوبنا، خلّينا نكون قراب من الربّ،
والإنجيل ينوِّر طريقنا وهيك منفرح لفرح الآخرين
ومنحزن لحزنُن، والله معك.