منتدى الفرح المسيحى

فن التفاهة .
https://upload.chjoy.com/uploads/172354070030611.jpg

قالوا فى الامثال زمان "علمنى التفاهة،
قاله تعالى فى الهايفة و اتصدر" !!

و كتير من الناس عندهم التفاهة "فن" يتدرس فى ارقى الجامعات !!

التفاهة يعنى تعمل حاجات كتيرة ، بس مش مهمة ،
لا تفرق معاك و لا مع حد من أصله !!

يعنى تضيع وقتك و صحتك فى "كلام فارغ" ،
لا يبنى مستقبلك و لا ينمى عقلك و لا يزود مهاراتك ..

و التفاهة "بياعة" .. يعنى ناس بتبيع لك شوية حاجات
"بلا قيمة" لما تحس -لمؤاخذة- بتفاهتك !!
و تقعد تضيع وقتك و مجهودك فى شرا حاجات ح ترميها بعد كده ،
و مش ح يشوفها غيرك، و يمكن انت نفسك ما تشوفهاش خالص
و تركنها ، و بعد شوية تنساها او تبدلها او ترميها او تشتري غيرها ..

اسأل دولابك ، فيه قد ايه هدوم متكومة اتخانقت عليها ،
و بعدين رميتها على شماعة و بقت مليانة تراب
و يمكن ما لبستهاش و لا مرة .. بس ساعة ما اشتريتها اتخانقت
و صممت و رجعت و فاصلت و فى الآخر طلعت كلها زى بعض !!
و كان ممكن تبقى عملي و ذكى و أنيق بس بمجهود عاقل
، و توفر وقتك لحاجات مهمة و غالية فى حياتك ..

و اسأل نفسك ، ضيعت وقت قد ايه فى مناقشات
و حوارات و خناقات علي كلام "فارغ"
، كان ممكن تتجنبها لو كبرت مخك و عديت الأمور..
،
المشكلة ان "التفاهة" بتسرق عمرك و مجهودك
و صحتك و انجازاتك ، و بتحرمك من الاهم و المهم
من النجاح و العمل و حتى الاستمتاع الراقى بالحياة و ما فيها ..

اسألوا العظماء و الناجحين و الابطال ،
ح تلاقوا ان اهم حاجة انتصروا عليها "فن تضييع الوقت فى التفاهات" ..