منتدى الفرح المسيحى - زوادة اليوم: أعطني ثمن الغدا 2024/6/5

زوادة اليوم:
أعطني ثمن الغدا

https://upload.chjoy.com/uploads/171747771631661.jpg
بيخبّرو عن الأم تريزا إنّو خلال رحلة من رحلاتها على نيو مكسيكو ولما قدّمتلها المضيفة طبق الغدا سألتها :

«قدَّي بيكلّف الطبَق الواحد يلّي بتقدموه للمسافرين»؟

جاوبتها المضيفة :

«دولارين».

بتقلّها الأم تريزا :

«ممكن تسترجعيلي طبقي وتعطيني دولارين؟
هيك بقدمُّن للفقرا بمدينة نيو مكسيكو».

المضيفة ما بتجاوب على السؤال، إنّما بتتوجّه لقائد الطائرة
وبتخبّرو عن طلب الأم تريزا؛ قائد الطيارة جاوبها :

«أكيد رجعيلها التنَين دولار».

الركّاب يلّي كانو قاعدين حَدّها طلبو نفس الطلب،
وهيك كل ركّاب الطيّارة طلبو إنّو يردّولُن التنَين دولار بدال وجبة الغدا، وقدّمو المبلغ للإم تريزا يلّي بكل محبّة نزلِت من الطيّارة وبجيبتها 194 دولار لفقرا مدينة نيو مكسيكو.

الزوّادة بتقلّي وبتقلّك :
ما تقلّل من قيمة العمل يلّي عَم بتقوم فيه، آمِن بمشروعك،
عطي من كل قلبك، والربّ بيبارك عطاءك
، لازم تعرف على طول إنّو العطاء بيِعدي، والله معك.