الإيمان مش تمثال عم يرشح زيت، الايمان مش مسبحة وبخور ع صورة، الايمان مش ضو بغيمة ع شكل قديس.

الإيمان مش وعظة رنانة ولا توب اسود منَسور وعتيق. الإيمان مش صليب مدقوق ع كتف ولا غيبة عن الوعي قدام صليب ولا صوت استعراضي ولا ظهور عجيب صار مزراب دهب للبعض.

الإيمان انك توثق بحضور “الله الروح” اللي هوي خارج الزمان والمكان ولو عيونك وحواسك خانوك.

الإيمان انك تمشي ع الموج وبقلبك حبة خردل. الإيمان انك تشوف حجر مدحرج مع كل طلعة شمس. الايمان انك ما تركض ورا تمثال عيونو دم وخوري حكوجي، وزيت ع صورة… الايمان انك توقّف ركض هون وهونيك… ركاع للقربان. وحِب كل إنسان. هيدا إيمان. الايمان مش لاهوت مغطّس بالفلسفة ولا محاضرة مبكّلة.

الايمان هوي صرخة برتلماوس الأعمى. دموع مار بطرس. شعر المجدلية ع إجريه.
الايمان انك تآمن بالحب لو صقعت القلوب, تآمن بالفجر لو طوّل الليل.