منتدى الفرح المسيحى - وانت حابب تشكر ربنا على ايه السنة دي

https://upload.chjoy.com/uploads/170399637329911.jpg

انهارده في اخر يوم في السنة حابه اشكر ربنا على لطفه وابوته ومحبته اللى غمرني بيها طول السنة
حابه اشكره على حبه اللى كل يوم بيمتعني بيه اكتر وعايزه اشكره علشان رجعنى تاني لحضنه بعد ما كنت بعيدة اوي عايزة اشكره على انه بيكبرني وبيعلمنى وبيربينى كل يوم
على انه مش بيزهق منى بالرغم من كل خطاياي عايزة اشكره على غفرانه ليا عايزة اشكره على كل حقيقة كشفها قدامي مكنتش بشوفها قبل كدا عايزة اشكره لانه بيشفي كل يوم
قلبي المكسور عايزة اشكره على تعزيته ليا في احزاني وفي لحظات اكتئابي عايزة اشكره علشان دايما بيشجعني في وقت يأسي ومش بيخلينى استسلم عايزه اشكره انه غير افكاري الغلط عنه وعن الحياة عموما
وعايزة اشكره لانه كان معايا في وقت خوفي وخصوصا في الوقت اللى كانت مريم اختى بتعمل فيه عمليه عايزة اشكره على شفائه ليها هو والعدراء مريم اللى عمرها ماخذلتنى فاي طلبه طلبتها قبل كدا منها
وعايزه اشكره على انه نجحنى السنة دي في شغلي وفي حياتي عايزة اشكره لان حياتى بقى ليها معنى جديد بحضوره فيها ..
في الحقيقة انا كنت السنة اللى فاتت مش متوقعة اى حاجة كويسة ممكن تحصلي السنة دي بس العجيب ان السنة دي كانت بالنسبالي سنة مميزة جدا جدا
واللى ميزها هي حب ربنا ليا اول مرة احس ان حبه لمسنى بالشكل دا وكمان احساسي بوجوده معايا ومشاركته ليا في كل لحظه
بصراحة في حاجات كتير اوي جميلة حصلت معايا السنة دي كلمة شكرا قليلة اوي عليها

شكرا يارب لانك ابويا وانك بتحمينى وبتحفظنى
وبتمنى بجد للسنة الجديدة انك تكون معايا
وان افضل دايما بنمو في حبك وبثبت فيك
وبتمنى لكل واحد لسه مش مدرك محبتك الغير مشروطة ان السنه دي تكون بتاعتك تكون سنه الحب و محبتك تلمس قلوب كل الناس وتكون سنة مقبولة سنة شفاء لكل القلوب الجريحة سنة لحبك الشافي
"«رُوحُ الرَّبِّ عَلَيَّ، لأَنَّهُ مَسَحَنِي لأُبَشِّرَ الْمَسَاكِينَ، أَرْسَلَنِي لأَشْفِيَ الْمُنْكَسِرِي الْقُلُوبِ، لأُنَادِيَ لِلْمَأْسُورِينَ بِالإِطْلاَقِ ولِلْعُمْيِ بِالْبَصَرِ، وَأُرْسِلَ الْمُنْسَحِقِينَ فِي الْحُرِّيَّةِ، وَأَكْرِزَ بِسَنَةِ الرَّبِّ الْمَقْبُولَةِ»." (لو 4: 19)

وفي النهاية احب اقول شكرا من كل قلبي على السنة دي وفي انتظار سنة جديدة سعيدة مع يسوع

ودي كانت الحاجات اللى حبيت اشكر ربنا عليها وانت كمان متنساش تخبر كل واحد عن ماذا صنع بك الرب
"وَأَخْبِرْهُمْ كَمْ صَنَعَ الرَّبُّ بِكَ وَرَحِمَكَ"
(مر 5: 19)

انت بقى حابب تشكر ربنا على ايه السنة دي