منتدى الفرح المسيحى - اجري علي ربنا علشان قلوبنا تتغير

https://upload.chjoy.com/uploads/170353436936521.jpg

كله الايام دي يا ابونا عاوز اعترف قبل السنه الجديده
ولو قولتله خليها بعد العيد مثلا يقولي اذاي لازم قبل السنه
ده شئ جميل وحلو ان الواحد يبقي عاوز يعترف
ويحاسب نفسه قبل السنه الجديده
بس المشكله ان السنه دي مجرد رقم ربنا بيسمح بيه
في حياتنا لتجديد العهود والوعود والإشواق جوانا
بس المشكله انك هاتعترف علشان واخد قرار؟
ولا علشان اريح ضميري؟
يعني قادر تروح للشخص اللي جرحته
وتقوله أنا جرحتك سامحني
قادر تروح للشخص اللي بتتكلم عليه من ضهره
وتقوله أنا ادنتك سامحني
قادر اني اوقف كل حاجه أنا عارف انها معطلاني عن ربنا
حلو انك تاخد ميعاد تعترف فيه بس علشان التغيير يبقي صح
لازم كمان تكون صادق في كلامك وأفعالك
تبقي قلبك متغير
ماتعترفش اعترافك وسايب قلوب مجروحه بسببك
وسايب ناس اتشوهت صورتهم بسبب إدانتك ليهم
اجروا الحقوا اعترفوا وخدوا مواعيد من اباء الكهنه وكل حاجه
بس اجري علي ربنا علشان قلوبنا تتغير
ومايكونش سر الاعتراف مجرد روتين بيتعمل قبل راس آلسنه